धनुषा : जिल्ला प्रशासन कार्यालय धनुषाले प्रदान गर्ने नियमित सेवा मिथिला नगरपालिका बाहेक जिल्ला स्थित अन्य सबै स्थानीय तहका लागि सुचारु गरेको छ ।
कोरोना संक्रमणको प्रभावकारी रोकथाम एवं नियन्त्रणका लागि जिल्ला प्रशासन कार्यालय धनुषाबाट स्थगित गरिएका नियमित सेवाहरु सामाजिक दूरी कायम गर्दै स्वास्थ्य मापदण्डहरु अपनाएर सेवा सुचारु गरेको हो ।
जिल्ला प्रशासन कार्यालय धनुषाले लामो समय पश्चात सक्कल नागरिकता प्रमाणपत्र, नागरिकताको प्रतिलिपि र राहदानी वितरण गर्ने कार्यको शुरुवात गरेको प्रशासकिय अधिकृत गणेश मिश्रले जानकारी दिएका छन ।
जिल्ला प्रशासन कार्यालय धनुषाले जारी गरेको सूचनामा जिल्लाका १८ स्थानीय तह मध्ये १७ वटाको मात्रै सेवा प्रदान भनी नामावली प्रकाशन गरेको छ । हुनत जिप्रकाले प्राविधिक त्रुटिले मिथिला नगरपालिकाको नाम छुटन गएको बताएका छन ।
आईतबार हंसपुर नगरपालिका, धनुषाधाम नगरपालिका र विदेह नगरपालिका, सोमबार नगराईन नगरपालिका, सबैला नगरपालिका र गणेशमान चारनाथ नगरपालिका, मंगलबार जनकपुरधाम उपमहानगरपालिका, मिथिला बिहारी नगरपालिका र क्षीरेश्वरनाथ नगरपालिका, बुधबार जनकनन्दनी गाउँपालिका, लक्ष्मीनिया गाउँपालिका र औरही गाउँपालिका, बिहीबार मिथिला नगरपालिका, मुखियापट्टी मुसहरनिया गाउँपालिका र बटेश्वर गाउँपालिका तथा शुक्रबार कमला नगरपालिका, धनौजी गाउँपालिका र शहिदनगर नगरपालिकाका सेवाग्राहीहरुलाई सक्कल नागरिकता प्रमाणपत्र, नागरिकताको प्रतिलिपि र राहदानी वितरण गर्ने जनाएको छ ।
त्यस्तै, आईतबारदेखि बुधबारसम्म संघ संस्था दर्ता तथा नविकरण एवं बिहीबार र शुक्रबार पत्रपत्रिका÷छापाखाना दर्ता तथा विधान संशोधन सम्बन्धी कार्यहरु गरिने जनाइएको छ ।
जिल्ला प्रशासन कार्यालयद्वारा जारी सूचना
