जसपा विभाजन हुँदै छ ?

काठमाडौं – प्रदेश र प्रतिनिधिसभा निर्वाचनको अन्तिम मत परिणाम आएसङै जनता समाजवादी पार्टी भित्र मतभेद सुरु भएको छ । निर्वाचनको मत परिणामलाई लिएर जसपा भित्र दुई धार देखिएको छ । आगामी दिनमा एमालेसङको गठबन्धनलाई निरन्तरता दिने वा फेरी सत्ता गठबन्धनमा सामेल हुने भन्ने विषयलाई लिएर जसपा भित्र विवाद सिर्जना भएको हो ।

निर्वाचनको मत परिणामलाई लिएर केन्द्रीय अध्यक्ष उपेन्द्र यादव र सङ्घीय परिषद् अध्यक्ष अशोक राईका फरक फरक कारण सार्वजनिक भएका छन् । निर्वाचनका लागि मात्रै एमालेसंग तालमेल गरेकाले निर्वाचन सम्पन्न भएसङै एमालेसङको सहकार्यको औचित्य पनि समाप्त भएको अध्यक्ष यादवको भनाई छ ।

तर सङ्घीय परिषद् अध्यक्ष अशोक राईले भने अध्यक्ष यादवले पार्टीको भन्दा पनि आफ्नो व्यक्तिगत धारणा सार्वजनिक गरेको भन्दै एमालेसङको गठबन्धनलाई निरन्तरता दिने प्रतिक्रिया दिएका छन् । दुई अध्यक्ष विवादले कतै फेरी जसपा विभाजित हुने त होइन भन्ने विश्लेषण समेत सुरु भएको छ । यद्यपि नेताहरूले भने यत्ति कुराले जसपा विभाजित नहुने दाबी गरेका छन् ।

“अब हामी सत्ता गठबन्धनमा गयौँ भनेर, हाम्रो केन्द्रीय अध्यक्षले, त्यो कुरा त गर्नु भएको छैन । हाम्रो सङ्घीय परिषद्को अध्यक्षले पनि, हाईन अब सत्ता गठबन्धनमा नजाने, एमालेसङ मात्रै सहकार्य गर्ने पनि भन्नु त भएको छैन । कुरा के हो भने, सहकार्य गर्दै जाँदा, त्यसमा दुवै जना स्पष्ट हुनुहुन्छ । त्यसो हुँदा खेरी भोलि हाम्रो माग मुद्दासङ कसरी सहमति बन्दै जान्छ त्यसै गरी हाम्रो पार्टीले निर्णय लिन्छ । तर यत्ति कुराले पार्टी नै विभाजन हुन्छ भन्ने चाहिँ होइन ।” – प्रकाश अधिकारी, नेता, जनता समाजवादी पार्टी

अध्यक्ष उपेन्द्र यादवले विराटनगरमा दिएको अभिव्यक्ति पछि जसपा सरकार गठनका लागि सत्ता गठबन्धनसङ नजिकिएको कतिपयको बुझाई छ । मधेस प्रदेशमा मुख्यमन्त्री लिएर केन्द्रमा सत्ता गठबन्धनलाई समर्थन गर्ने सर्तमा जसपा बालुवाटार जान सक्ने धेरैको बुझाई छ । अध्यक्ष यादवले सत्ता बार्गेनिङका लागि समेत आफ्ना विश्वास पात्रलाई बालुवाटार पठाएको काँग्रेस नेताहरूको दाबी छ ।

नेपाली काँग्रेसका एक कार्यसम्पादन सदस्यले भने, “हाम्रो नेतृत्वमा सरकार बन्ने कुरामा कुनै शङ्का छैन । तर हाम्रो मात्रै बहुमत पुग्दैन । सत्ता गठबन्धनको मात्रै सरकार बन्ने अवस्था पनि छैन । त्यसैले हामीले साना पार्टी र स्वतन्त्रहरुसंग छलफल सुरु गरेका छौँ ।  त्यसमा उपेन्द्रजीको पार्टीका साथीहरू पनि सम्पर्कमा आउनु भएको छ । कुरा मिलेको अवस्थामा हामीलाई केन्द्र देखि सातै प्रदेश सरकार गठन गर्न पनि सहज हुन्छ । उहाँको स्वागतका लागि हामी तयार छौँ ।”

निर्वाचनमा आफूहरूले सबै मत एमालेलाई दिए पनि एमालेले भने आफ्नो मत अरू नै उम्मेदवारलाई दिएको जसपाका अध्यक्ष यादव पक्षधरको आरोप छ । जसपाकै कारण मधेस प्रदेशमा एमाले पाँचौँ बाट पहिलो दल बनेको उनीहरूको ठम्याई छ । दुई अध्यक्षका फरक फरक धारणा सार्वजनिक भए पनि विपक्षीहरूले भने पार्टीलाई कमजोर पार्न अनावश्यक हल्ला फैलाएको जसपाका नेताहरूको दाबी छ ।

“ उपेन्द्र ज्यूले चाहिँ के भन्नु भएको हो भने, अब निर्वाचनको लागि जुन तालमेल बनेको हो त्यो तालमेल चाहिँ सकियो भन्नु भएको हो । सहकार्य त भोलि पनि हुन सक्छ नि । र अशोकजीले पनि अहिलेको निर्वाचनमा जुन तालमेल भएको थियो त्यसलाई पनि हामीले निरन्तरता दिन्छौँ भन्नु भएको हो । तर के भई दियो भने, यहाँ मिडियाहरूले अनेक तरिकाले त्यसलाई व्याख्या गरे । यो मिडियाहरूको व्याख्या हो । र विपक्षीको व्याख्या हो । खासमा पार्टीमा कुनै विभाजन हुने अवस्थै आएको छैन । ” — रेखा यादव, नेतृ, जनता समाजवादी पार्टी।

सप्तरी क्षेत्र नं २ मा  जसपाका अध्यक्ष उपेन्द्र यादवलाई हराउँदै उदाएका सिके राउतलाई सरकारमा सामेल हुन रोक्नका लागि समेत उपेन्द्र यादवले एमालेसङको सहकार्य सकिएको अभिव्यक्ति दिएको कतिपयको बुझाइ छ । मधेस प्रदेश देखि केन्द्र सरकार गठनका लागि निर्णायक शक्ति मानिएका जनमत पार्टीका अध्यक्ष सीके राउतले सरकारमा सामेल हुन सबै दलसङको भेटघाटलाई बाक्लो बनाएका छन् ।

तर जसपा सत्ता गठबन्धनमा सामेल भएको अवस्थामा भने केन्द्र देखि सातै प्रदेशमा सरकार निमार्णका लागि सत्ता गठबन्धनको बहुमत पुग्ने छ । कारण जे भए पनि जसपाले एमालेको साथ छोड्दा एमाले केन्द्र देखि सातै प्रदेशको नेतृत्व गर्नबाट वञ्चित हुने छ ।

२०७२ साल जेठ २ गते उपेन्द्र यादव नेतृत्वको तत्कालीन मधेसी जनअधिकार फोरम नेपाल र अशोक राई नेतृत्वको तत्कालीन सङ्घीय समाजवादी पार्टीबिच एकीकरण भएको थियो ।  मधेस केन्द्रित दलहरूको मुद्दा बोकेको मधेसी जनअधिकार फोरम र जनजाति केन्द्रित दलहरूको मुद्दा बोकेको सङ्घीय समाजवादीबिच एकीकरणपछि पार्टीको नाम ‘सङ्घीय समाजवादी फोरम’ राखिएको थियो ।

समयसङै उपेन्द्र यादव र अशोक राईले नेतृत्व गरेको
सङ्घीय समाजवादी फोरम र डा.बाबुराम भट्टराईबिच २०७६ साल वैशाख २३ गते एकीकरण भएको थियो । फेरी  २०७७ साल वैशाख १० गते तत्कालीन राष्ट्रिय जनता पार्टी र बिच पार्टी एकीकरण हुँदै जनता समाजवादी पार्टी बनेको थियो ।

तर नेताहरूको दम्भ र सत्ता स्वार्थका कारण महन्थ ठाकुरले पार्टी विभाजन गरेर लोकतान्त्रिक समाजवादी पार्टी गठन गरेका छन् । यस्तै डा.बाबुराम भट्टराईले पनि जसपा छोडेर नेपाल समाजवादी दल गठन गरेका छन् । फेरी अहिले जसपा भित्र देखिएको खटपटले कतै जसपा विभाजन हुने त होइन भन्ने आशङ्का उब्जिएको हो । क्यानाडानेपाल