जनकपुरधाम । ‘बेटी पढाउ बेटी बचाउ’ कार्यक्रमअन्तर्गत साइकल खरीद अनियमितता काण्डमा मुछिएका मधेश प्रदेशका मुख्यमन्त्री मोहम्मद लालबाबु राउत गद्दीमाथि अख्तियार दुरुपयोग अनुसन्धान आयोगले अर्को एक्सन लिएको छ ।
साइकल खरीदमा कागजात नियन्त्रणमै लिएर अनुसन्धानसहित भ्रष्टाचार भएको अभियोगमा मुद्दा दर्ता गरिसकेको अख्तियारले भ्रष्टाचारको अर्को काण्ड ‘मधेश मन्थन’ मा छानविन सुरु गरेको हो ।
अख्तियाले ‘मधेश मन्थन’ कार्यक्रममा भएको अन्धाधुन्ध खर्च हिसाब मागेको हो । गत आर्थिक वर्षको अन्त्यमा एउटा सञ्चार गृहले ‘मधेश मन्थन’ कार्यक्रमको आयोजना गरेको थियो । त्यसमा मधेस प्रदेशको मुख्यमन्त्री तथा मन्त्रिपरिषद्को कार्यालय लगायत केही मन्त्रालय, मधेस स्वास्थ्य विज्ञान प्रतिष्ठान, प्रदेश सभा, जनकपुरधाम उपमहानगरपालिका लगायतका सरकारी निकायहरुको नाम प्रायोजकमा राखिएको थियो ।
अख्तियारले निजी संस्थाको कार्यक्रममा सरकारी रकम प्रयोग गरिएकोमा सवाल उठाउँदै विवरण मागेको उच्च स्रोतले जनाएको छ । स्रोतका अनुसार अख्तियारले त्यसको प्रक्रिया लगायतका जानकारी पनि मागेको छ । साइकल खरीदलगायत अन्य परियोजनामा मुख्यमन्त्री राउतकै सलग्नता सत्ताको आडमा भ्रष्टाचार काण्डहरु भए पछि अख्तियारले उच्च प्राथमिकताका साथ छानविन अगाडि बढाएको हो ।
