काठमाडौं । जनता समाजवादी पार्टी नागरिकता विधेयकको विरोधमा रहेको पुष्टि भएको छ । बाहिरबाट नागरिकता कानुन बन्नुपर्ने गफ दिए पनि भित्रभित्रै प्रतिपक्षी एमालेसँग मिलेर नागरिक विधेयक फेल गराउनमा भूमिका खेलेको पछिल्लो घटनाक्रमले पुष्टि गरेको हो ।
मधेसको मुक्ति र मधेसी युवा तथा जनताको अधिकारका लड्दै आएको भने पनि उपेन्द्रले सत्ता र शक्तिका लागि यी सबै गरेको बेलाबखतको घटनाक्रमले पुष्टि गरिसकेको छ । तर अहिले उपेन्द्र मधेसी जनता विरोधी गतिविधिमा संलग्न हुनुले त्यसलाई थप पुष्टि गरेको छ । संविधान निर्माण लगत्तै नागरिकता कानुन बन्नुपर्नेमा सुरुवातमा कम्युनिस्टहरुको लडाइका कारण बन्न सकेन ।
त्यसपछि दुईपटक केपी ओलीले संसद विघटन गरे । ब्युतिएको संसदमा यसलाई अगाडि बढ्न नदिने गरी एमालेले ९ महिनासम्म संसद अवरुद्ध गर्यो । पछि देउवा सरकारले निरन्तर पहल गरेर नागरिकता विधेयक फास्ट ट्रयाकमा अगाडि बढायो । संसदको अन्तिमसम्म पनि नागरिकता कानुन बनाउने प्रयास गरियो । तर त्यसमा तगारो बन्यो एमाले र एमालेबाट राष्ट्रपति भएकी विद्यादेवी भण्डारी । एमालेले त नागरिकता कानुन रोकेकै थियो ।
त्यसमा मधेसीका लागि लडेको भन्ने उपेन्द्रको पनि मिलेमतो रहेको अहिले एमालेसँग जसपाको सहकार्यले पुष्टि गरेको छ । लाखौ युवाले नागरिकता पाउनुपर्ने नागरिकता कानुनको विरोधी शक्तिसँग हात मिलाउने उपेन्द्र पनि लाखौ नागरिकता पाउने अवस्था आउन नदिने भूमिकामा थिए भन्ने अहिले छरपष्ट भएको छ । त्यतिबेला गठबन्धनमा बसेर बाहिर नागरिकता कानुन बन्नुपर्छ भन्ने र भित्रभित्रै एमालेसँग मिलेर राष्ट्रपतिलाई नागरिकता विधेयक प्रमाणीकरण नगर्न उचाल्ने गरेको पनि यसले देखाएको छ ।
मधेसको नाममा लडेर, युवाहरुलाई आन्दोलनमा लगाएर, शहादत प्राप्त गर्ने अवसर सिर्जना गरेर आफू भने सत्ताका लागि जे पनि उपेन्द्रको चरित्रले मधेस फेरि एकपटक ठगिएको छ । नागरिकताबाट वञ्चित, नागरिकता नहुँदा अवसरबाट वञ्चित युवाहरुमाथि धोका भएको छ । नेपालपाना
