इरानले महसा अमिनीको हिरासतमा मृत्यु भएपछि भइरहेको विरोध प्रदर्शनलाई समर्थन गरेको भन्दै सर्वकालीन खेलाडी अली दाईको पासपोर्ट जफत गरेको छ।
हिरासतमा रहँदा एक कुर्दिस युवतीको ज्यान गएको विषयविरुद्ध भएको प्रदर्शनलाई समर्थन जनाएको भन्दै यसअघि पनि पूर्वफुटबलरलाई त्यहाँको आधिकारिक निकायले गिरफ्तार गरेको इरानी सञ्चारमाध्यमले उल्लेख गरेका थिए।
हिजाब नलगाएको आरोपमा तेहरानबाट सेप्टेम्बर १३ तारिखमा पक्राउ परेकी २२ वर्षीया महसा अमिनीको हिरासतमा रहँदा दुई साताअघि ज्यान गएको थियो। हिरासत कक्षमै अचेत भएपछि उनको मृत्यु भएको थियो। अमिनीको टाउकोमा लाठी प्रहार गरिएको र प्रहरीको गाडीमा ठोक्काइएको विवरण सार्वजनिक भएका छन्। यद्यपि सरकारी अधिकारीहरूले भने त्यसको खण्डन गरिरहेका छन्। अमिनीको ज्यान गएसँगै इरानमा पछिल्लो समय प्रदर्शन चर्किंदै गएको छ। प्रदर्शन र झडपमा परी अहिलेसम्म ५० भन्दा बढीले ज्यानसमेत गुमाइसकेका छन् भने सयौं संख्यामा प्रदर्शनकारीलाई त्यहाँको सुरक्षानिकायले गिरफ्तार गरेको छ।
दाईले सेप्टेम्बर २७ मा इरानको सरकारलाई प्रदर्शनकारीमाथि दमन गर्नुभन्दा पनि यस विषयको समस्या तत्काल हल गर्न आग्रह गरेका थिए। ‘मिसाहा अमिनीको मृत्युपछि अली दाईले सामाजिक सन्जाल इन्स्ट्राग्राममा निरन्तर सरकारविरोधी पोस्ट गरेकाले उनको पासपोर्ट जफल गरिएको छ,’ इरानका अधिकारीले भने।
पूर्वस्ट्राइकर अली दाईको नाममा सन् २०२१ सेप्टेम्बरसम्म सर्वाधिक अन्तर्राष्ट्रिय गोलको कीर्तिमान थियो। सन् २०२१ सेप्टेम्बरमा पोर्चुगलका स्ट्राइकर क्रिस्टियोनो रोनाल्डोले अली दाईको नाममा रहेको १ सय ९ अन्तर्राष्ट्रिय गोलको कीर्तिमान तोडेका थिए। अली दाई युरोपियन लिग खेल्ने पहिलो इरानका खेलाडी हुन्। उनले जर्मन बुन्डेसलिगाको क्लब आर्मेनिया बेहिल्फिल्ड, बायर्न म्युनिख र हर्था बर्लिनबाट खेलेका थिए।
इरानका महिलाहरू हिजाबले आफ्नो कपाल छोप्न र शरीर ढाक्न लामो तथा खुकुलो किसिमको लुगा लगाउन बाध्य छन्। टाउको छोपेको स्कार्फमुनि केही कपाल देखिएको आरोपमा गत सेप्टेम्बर १३ मा अमिनीलाई प्रहरीले तेहरानमा गिरफ्तार गरेको थियो।
कुर्दिस युवतीको ज्यान गएपछि इरानका अन्य खेलसम्बद्ध पदाधिकारीहरूले पनि आन्दोलनको समर्थन गरेका छन्। नायकनायिका, फिल्म निर्माताहरूले पनि प्रदर्शनमा साथ दिएको त्यहाँका सञ्चारमाध्यमले उल्लेख गरेका छन्। मंगलबार भियनामा इरानको सेनेगलसँग खेल हुँदा इरानको देश झल्किने पोसाकका अलावा समग्र टोलीले कालो रंगको कपडा लगाउँदै विरोधसमेत जनाएका थिए।
