कुटपिटपछि धनुषाको बटेश्वर गाउँपालिका प्रमुख प्रशासकीय अधिकृत रामजी जोसी कार्यालय आउन छाडेका छन् ।
गालीगलौज गरेको आरोपमा कार्यालयकै कर्मचारीहरुबाट कुटिएपछि प्रमुख प्रशासकीय अधिकृत जोसी १५ दिनदेखि कार्यालय आउन छाडेका हुन् ।
निमित प्रशासकीय अधिकृतको जिम्मेवारी समेत कसैलाई नतोक्दा कार्यालयको नियमित कार्यसम्पादन प्रभावित बनेको छ ।
गत असार २९ गते कार्यालयमा गालीगलौज गरेेको भन्दै करारका केही कर्मचारीले प्रशासकीय अधिकृत जोसीमाथि हातपात गरेका थिए । सोही दिन भोलिपल्ट कुटपिट विषयमा कार्यालयमा छलफल गर्ने सहमति गरेर गएका जोसी हालसम्म कार्यालय फर्केका छैनन् ।
कार्यालयमा भएको घटनादेखि प्रशासकीय अधिकृत जोसी कार्यालय नआएको र निमित्त पनि कसैलाई न तोकेको नवनिर्वाचित गाउँपालिका अध्यक्ष रामअशिष महतोले बताए ।
उनका अनुसार सो बेलादेखि जोसी सम्पर्कविहीन बनेका छन् । कार्यालयको समान्य कामकाज प्रशासन तर्फकी अधिकृत सुलेखा महतोको तोकले हुने गरेको प्रमुख महतोको भनाइ छ ।
जोसीले आफूलाई कुटपिट गर्ने कर्मचारीमाथि कारबाहीको लागि समेत कतै उजुरबाजुर गरेका छैनन् । उनी आफ्नो सरुवा गराउन गएको स्रोतको भनाइ छ ।
उनले आफू समान्य प्रशासन मन्त्रालयमा हाजिर भएको बताउँदै थप केही भन्न मानेनन् ।
कुटपिट प्रकरणपछि कार्यालय किन आउन छोड्नु भो, घटनापछि कुटपिट गर्नेविरुध कारबाहीको लागि किन अघि बढ्नु भएन भन्ने जिज्ञासामा उनले भने ‘म समान्य प्रशासन मन्त्रालयमा हाजिर भएको छु । पछि कुरा गरौंला ।’
एकवर्ष अघि कार्यकालमा आएदेखि उनी तत्कालीन गाउँपालिका प्रमुख डम्बरबहादुर राउत क्षेत्रीलाई समेत प्रभावमा लिएर विभिन्न शीर्षकमा व्यापक अनियमितता गरेको आरोप छ ।उनले कार्यालयको थुप्रै कागजात बर्दिबासको डेरामा राखेको कार्यालय स्रोतले जनाएको छ ।
काम पर्दा जनप्रतिनिधि र कर्मचारी बर्दिबास पुग्ने गरेको एक जनप्रतिनिधिले बताए ।
केही दिन अघि मात्र जोसीले कार्यालयमा कहिले नआउने करारका इन्जिनियर शौरभ कुशवाहालाई एकैपटक तीन महिनाको हस्ताक्षर गरेर तलब खवाएको खुलासा भएको थियो।
कुटपिट गर्ने विरुद्ध अघि बढे आफूले गरेको करोडौं अनियमितताको भण्डाफोर हुने डरले जोसी सरुवाको प्रकृयामा लागेको बुझिएको छ ।
