काठमाण्डौं । अमेरिकी सहयोग परियोजना मिलेनियम च्यालेञ्ज कर्पोरेशन (एमसीसी) को विरोधमा रहेको पक्ष र सुरक्षाकर्मीबीच नयाँ बानेश्वरमा झडप भएको छ । एमसीसीमाथि सम्झौतामाथि प्रतिनिधि सभाको बैठकमा छलफल हुँदै गर्दा बानेश्वरमा विरोधमा उत्रिएको पक्ष र प्रहरीबीच झडप भएको हो ।
बिहानदेखि नै उक्त क्षेत्रको सुरक्षा कडा बनाइएको भए पनि कम्युनिष्ट घटकहरुले जुन दिन संसद खुल्छ त्यही दिन माइतीघर मण्डलादेखि नयाँ बानेश्वर क्षेत्रमा विरोध गर्दै आइरहेका छन् । उक्त क्रममा आज पनि झडप भएको हो । सो क्रममा उनीहरुले सडकमा रहेका संरचना भत्काउनेदेखि केही छेउँका पसलमा पनि क्षति पुर्याउँदै आएका छन् ।
एमसीसीको विरोध गर्ने नाममा सुरक्षाकर्मीमाथि ढुङ्गा, लाठी बर्साउने काम उनीहरुले गर्दै आएका छन् । उक्त कार्य रोक्नका लागि सुरक्षा दस्ता कडा बनाइएको भए पनि उनीहरु आक्रामक बन्दै आएका छन् ।
आजको विरोधमा सत्तारुढ दलहरु नेकपा माओवादी केन्द्र र नेकपा एकीकृत समाजवादीका कार्यकर्तासमेत सहभागी भएका छन् ।
सो क्रममा ढुङ्गासमेत हानाहान भएको छ ।
एमसीसी गत फागुन ८ गते संसदमा टेबल भएको थियो । अमेरिकाले यही फागुन १६ गतेभित्र सम्झौता संसदबाट टुंगो लगाउन नेपाल सरकारलाई अल्टिमेटम दिएसँगै शेरबहादुर देउवा नेतृत्वको सरकार तातेको हो । देउवाले सबै दलको सहमतिमा एमसीसी अनुमोदन गर्न पहल गरिरहेका छन् ।
तर पनि सत्ता साझेदार दलहरू नै एमसीसीको विपक्षमा उभिएका छन् । संसदमा टेबल गर्न दिने तर विपक्षमा मतदान गर्ने माओवादी केन्द्र र नेकपा एकीकृत समाजवादीको नीति रहेको छ ।
नेपाली कांग्रेसबाहेक जनता समाजवादी पार्टी (जसपा) ले अनुमोदन गराउनु पर्ने पक्षमा रहेको छ । जसपाभित्र डा. बाबुराम भट्टराई पक्ष ढुक्क छ भने अध्यक्ष उपेन्द्र यादवले मुख खोलेका छैनन् । र पनि नेता मनिष सुमनले भने मिडियामा जसपा एमसीसीकै पक्षमा रहेको बताएका छन् ।
सत्ताधारी बाहेकको लोकतान्त्रिक समाजवादी पार्टी (लोसपा) ले पक्षमा मतदान गर्ने निर्णय गरेको छ । त्यस्तै प्रमुख प्रतिपक्ष दल नेकपा एमाले पहिलेदेखि नै पक्षका लागि स्पष्ट भएको अध्यक्ष केपी शर्मा ओलीले बताएका छन् ।
