काठमाडौं । सत्तारुढ दल नेपाली कांग्रेसले आसन्न निर्वाचनमा कम्युनिस्टहरुलाई हराउन नयाँ कार्यक्रम अघि सारेको छ ।
वैशाख ३० मा हुने स्थानीय तह निर्वाचन, त्यसपछि प्रदेश र संघीय निर्वाचनमा एक भएर जुट्ने निर्णय गर्दै कांग्रेसले जनताको घरघरमा पुग्ने देशव्यापी कार्यक्रम ल्याउन लागेको हो ।
केन्द्रीय कार्यसम्पादन समितिले पूर्ण एकता र सक्रियताका साथ निर्वाचनमा केन्द्रित हुने निर्णय गर्दै एक महिने घरघर जाउँ कांग्रेस जिताउ अभियान चलाउने भएको हो ।
फागुन २० देखि चैत २० सम्म सञ्चालन हुने अभियानका लागि भ्रातृ संगठनहरुलाई परिचालन गरिनेछ ।
स्थानीय निर्वाचन तयारी सम्बन्धमा यस्तो छ निर्णय:
(क) स्थानीय निर्वाचन २०७९ बैशाख ३० मा गर्ने सरकारको निर्णय स्वागत गर्दै यो बैठक सम्पूर्ण एकता र सम्पूर्ण सक्रियता साथ स्थानीय निर्वाचनमा केन्द्रित हुने निर्णय गर्दछ । स्थानीय निर्वाचन घोषणा पत्र तयारी समिति सभापतिले आवश्यक परामर्श गरी अविलम्व गठन गर्ने निर्णय गर्दछ ।
(ख) संगठन सुदृढीकरण गर्दै आगामी स्थानीय निर्वाचनमा नेपाली कांग्रेसलाई विजयी गराउने लक्ष्य साथ—घर–घर जाऔं, कांग्रेस जिताऔं’ अभियान अघि बढाएर पार्टीको सबै तह, सबै भ्रातृ र शुभेच्छुक संस्था सम्पूर्ण रुपले एक्यवद्ध भएर सहभागी हुने निर्णय गरिएको छ । • अभियानको समयावधि – फागुन २० देखि चैत २० सम्म ।
