काठमाडौं । महोत्तरीमा दलित महिलालाई अपहरण गरी सामूहिक बलात्कार गरी हत्या गरेको आरोपमा दुईजना पक्राउ परेका छन् । घटनाको झण्डै २ महिना पश्चात दुबै अभियुक्तलाई महोत्तरीले पक्राउ गरेको हो ।
पक्राउ पर्नेमा महोत्तरी भंगाहा नगरपालिका ५ सितापुर बस्ने २४ वर्षीय बिपीन मण्डल र धनुषाको क्षिरेश्वरनाथ नगरपालिका ३ पर्सा पकडिया बस्ने वर्ष ४२ का मनोज यादव रहेको महोत्तरीका प्रहरी प्रवक्ता डिएसपी प्रकाश विष्टले जानकारी दिए ।
मण्डल घरबनाउने मिस्त्री छन् भने यादव कृषक हुन् । प्रहरीका अनुसार गएको असोज १३ गते राति ११ बजेको समयमा दुबैजनाले महोत्तरीको भंगहा नगरपालिका २ बखरी टोल बस्ने श्याम सदाका श्रीमती अन्दाजी ३५ की अमृता सदालाई घरबाटै ज.९ प ५१५८ मोटरसाइकलमा चढाएर लगेका थिए । पुनः १४ गते बिहान ३ बजेको समयमा अमृता सदालाई वेहोस अवस्थामा घरमै पुर्याएर फरार भएका थिए । अमृताको प्रादेशिक अस्पताल जनकपुरमा उपचारको क्रममा सोहि दिन राति १० बजेको समयमा मृत्यु भएको थियो ।
डिएसपी विष्टका अनुसार बिगत २ वर्षदेखि मृतक अमृता र मनोजबीच चिनजान रहेको थियो । मनोजले अमृतालाई फोन गरी घरबाट असोज १३ गते राति उनलाई दबैजनाले मोटरसाईकलमा चढाएर बखरी गाउंदेखि उत्तरको चौरीमा लगेर पालैपालै बलात्कार गरेको प्रहरीको अनुसन्धानबाट खुलेको छ । बेहोस भएपछि पुनः बिहान ३ बजे अमृतालाई घरमा लगेर छाडेका थिए । सो घटना पश्चात फरार दुबैजनालाई महोत्तरी प्रहरीले बुधबार अपराहन्न ४ बजे बिपीनलाई आफ्नै गाउंमा लुकिछिपी बसिरहेको अबस्थामा पक्राउ परेको र मनोजलाई, सिरहाको मिर्चैया नगरपालिका ५ मा लुकीछिपी बसेको अबस्थामा पक्राउ गरेको डिएसपी विष्टले जानकारी दिए ।
दुबैजनामाथि जबरजस्ती करणी तथा कर्तव्य ज्यान मुद्दामा म्याद थप अनुसन्धान गरिरहेको जिल्ला प्रहरी कार्यालय महोत्तरीले जनाएको छ ।
