धनुषा : नेपाल राष्ट्र बैंकले निषेधाज्ञाको अवस्थामा पनि आधारभूत बैंकिङ सेवा जारी राख्ने दिएको निर्देशनको भोली पल्टै बैंकिंग सेवा बन्द भएको छ ।
बैंकहरुले आफ्नो हेड अफिस (मुख्य कार्यालय) बाहेक सबै शाखा बन्द गर्ने निर्णय गरेका छन् । बैंकरहरुको संगठन नेपाल बैंकर्स संघले कर्मचारीलाई अफिस आवत जावतमा प्रहरीले अवरोध गर्ने गरेको कारण सबै बैंक शाखा बन्द गर्ने निर्णय गरेको छ ।
काठमाडौं उपत्यकामा निषेधाज्ञामा भएपछि हरेक वाणिज्य बैंकको काठमाडौंमा पाँचवटा, भक्तपुरमा १ वटा र ललितपुरमा २ वटा गरी आठ शाखा सञ्चालन गर्ने निर्णय भएको थियो । त्यसको लागि बैंकहरुले प्रहरी प्रशासन र राष्ट्र बैंकसँग समेत समन्वय गरेका थिए ।
बिहीवार बिहानदेखि बैंकका कर्मचारीलाई प्रहरीले कार्यालय जान अवरोध गरेको कारण नेपाल बैंकर्स संघले बैंकका शाखा बन्द गर्ने निर्णय गरेको बैंकर्स संघले जानकारी गराएको छ ।
बुधवार राष्ट्र बैंकको बैंक तथा वित्तीय संस्था नियमन विभागले इजाजतपत्र प्राप्त सबै बैंक तथा वित्तीय संस्थाहरुलाई स्वास्थ्य सुरक्षाका सबै मापदण्ड कायमै रहने गरी निषेधाज्ञा आदेश अवधिभर न्यूनतम बैंकिङ सेवा सुचारु गर्न निर्देशन दिएको थियो ।
सो अनुसार बैंक तथा वित्तीय संस्थाले बिहीबारदेखि विद्युतीय माध्यमबाट हुने कारोबारको सुनिश्चितता र सेवा प्रादान तथा अत्यावश्यक वस्तुको आपूर्ति सुनिश्चित गर्न ड्राफ्ट, टीटी, प्रतीतपत्र, ग्यारेन्टीजस्ता कारोबार सञ्चालन हुने व्यवस्था मिलाउन पनि निर्देशनमा भनिएको थियो ।
यस्तै सम्बन्धित स्थानीय प्रशासनसँग समन्वय गरी यथासम्भव निश्चित समयका लागि आलोपालो मिलाई न्यूनतम कर्मचारीबाट न्यूनतम संख्यामा शाखा खोली आधारभूत बैंकिङ कारोबारहरु नगद भुक्तानी÷जम्मा, बैंक, ट्रान्सफर, चेक क्लियरिङ आदि) सुचारु गर्ने व्यवस्था मिलाउन बैंक तथा वित्तीय संस्थालाई भनेको छ । lokpukar
