वीरगन्ज : कोरोना भाइरस संक्रमणबाट पर्सामा थप २ जनाको मृत्यु भएको छ । वीरगञ्जस्थित गण्डक अस्पताल र नरायाणी अस्पतालमा २ जना पुरुषको मृत्यु भएको पर्साका प्रमुख जिल्ला अधिकारी अस्मान तामाङले जानकारी दिए । उनका अनुसार गण्डक अस्पतालमा मृत्यु भएका ८४ वर्षीय वृद्ध गत श्रावण २७ गते उपचाररत थिए । उनको मंगलबार राति करिब साढे १० बजे नै मृत्यु भए पनि अस्प्तालले आज मात्र संक्रमणबाट उनको मृत्यु भएको सार्वजनिक गरेको उनले बताए ।
यस्तै, वीरगञ्ज महानगरपालिका भिश्वा बस्ने ५७ वर्षीय पुरुषको समेत मंगलाबार ०३:३० बजे संक्रमणबाट मृत्यु भएको प्रमुख जिल्ला अधिकारी तामाङले जनाए । उनका अनुसार भिश्वाका पुरुषलाई स्वास्थ्यमा समस्या देखिएपछि उपचारका लागि नारायणी अस्पतालमा भर्ना गरिएको थियो । उनको स्वाब संकलन गरी जिन एक्सपर्ट विधिमार्फत कोरोना परीक्षण गर्दा कोरोना पोजिटिभ आएको थियो ।
निमोनियाबाट ग्रसित उनलाई थप उपचारका लागि नेशनल मेडिकल कलेज र बयोधा अस्पताल पुर्याइए पनि अस्पतालले उपचार गर्न नमानेपछि नारायणी अस्पतालमा ल्याइएको बताइएको छ ।
योसँगै पर्सामा कोरोना संक्रमणबाट मृत्यु हुनेको संख्या २३ पुगेको छ ।
यस्तै, प्रमुख जिल्ला अधिकारी तामाङका अनुसार आज थप १ सय ४७ जनामा संक्रमण पुष्टि भएको छ । मंगलबार राति वीरगञ्जस्थित नारायणी अस्पतालको पीसीआर प्रयोगशालामा गरिएको परीक्षणमा १ सय १ जना पुरुष र ४६ जना महिलामा संक्रमण पाइएको हो ।
संक्रमित हुनेमा ७ वर्षको बालकदेखि ७० वर्षका वृद्ध पुरुष रहेको बताइएको छ । संक्रमण पुष्टि भएकाहरूमध्ये पर्सा जिल्लाको बहुदरमाइ नगरपालिकाका विभिन्न वडाका मात्र ९० जना रहेका छन् । यस्तै, बारा जिल्लाका ८ जना, पर्सा जिल्लाका १ सय ३८ जना र सप्तरी जिल्लाका १ जनामा संक्रमणप पुष्टि भएको हो ।
बारा जिल्लामा रहेको श्री चण्डी गणका ४ नेपाली सेना रहेका छन् । वीरगन्जमा रहेको भारतीय महावाणिज्यदूतावासका ४४ वर्षीया १ जना महिला रहेकी छिन् । बयोधा अस्पलाका विभिन्न वार्डमा कार्यरत ३६ जना कर्मचारी समेतमा संक्रमण पुष्टि भएको छ । सप्तरीका १ जनामा समेत संक्रमण पाइएको छ । todaypati
