काठमाडौं। सत्तारुढ दल राष्ट्रिय स्वतन्त्र पार्टी (रास्वपा) ले सुनसरीको कप्तानगञ्ज लगायत पूर्वी तराईका जिल्लाहरूमा हालै भएका साम्प्रदायिक तनाव र हिंसात्मक झडपप्रति आफ्नो गम्भीर ध्यानाकर्षण भएको जनाएको छ।
पार्टी सभापति रवि लामिछानेद्वारा मंगलबार जारी औपचारिक विज्ञप्तिमा ती घटनाहरूबाट उत्पन्न अशान्त परिस्थितिप्रति सिङ्गो पार्टी पंक्ति स्तब्ध र मर्माहत भएको उल्लेख गरिएको छ।
विज्ञप्तिमा घटनाका क्रममा ज्यान गुमाउनेहरूप्रति हार्दिक श्रद्धाञ्जली अर्पण गर्दै शोकाकुल परिवारजनमा गहिरो समवेदना व्यक्त गरिएको छ। साथै, झडपका क्रममा घाइते भएका आम नागरिक तथा अग्रपंक्तिमा खटिएका सुरक्षाकर्मीहरूको शीघ्र र पूर्ण स्वास्थ्य लाभको कामना गरिएको छ।
हिंसाबाट समस्याको समाधान हुँदैन
कुनै पनि किसिमको असन्तुष्टि, समस्या वा विवादको समाधान हिंसा र मुठभेडबाट कदापि सम्भव नहुने रास्वपाको स्पष्ट मान्यता छ। नेपाली समाजको वास्तविक शक्ति र सौन्दर्य भनेकै बहुलवादी संस्कृति, आपसी एकता, सहिष्णुता र सदियौंदेखि कायम रहेको सामाजिक सद्भाव भएको विज्ञप्तिमा जोड दिइएको छ।
रास्वपाले सामाजिक सद्भाव खलबलिने वा साम्प्रदायिक सहिष्णुतामा आँच आउने खालका कुनै पनि गतिविधि नगर्न आम नागरिक, नागरिक अगुवा, धार्मिक तथा सामाजिक व्यक्तित्वहरूका साथै सम्बद्ध सबै पक्षहरूसँग हार्दिक अपिल गरेको छ। संवेदनशील परिस्थितिमा कुनै पनि प्रकारको उत्तेजना, भ्रम वा अफवाहको पछि नलागी उच्च संयमता अपनाउनु नै अहिलेको प्राथमिक आवश्यकता भएको विज्ञप्तिमा उल्लेख छ।
निष्पक्ष छानबिन र राहतको माग
क्षेत्रीय शान्ति सुरक्षा कायम गर्न, सर्वसाधारणको जिउधनको रक्षा गर्न र अशान्त बनेको परिस्थितिलाई सामान्यीकरण गर्न पार्टीले नेपाल सरकार तथा स्थानीय प्रशासनसँग निरन्तर सहजीकरण गरिरहेको जानकारी दिएको छ।
घटनाको जरोसम्म पुगेर स्वतन्त्र, निष्पक्ष र द्रुत छानबिन गरी दोषीमाथि कडा कानुनी कारबाही गर्न रास्वपाले सरकारको ध्यानाकर्षण गराएको छ। साथै, पीडित पक्षलाई उचित न्याय, क्षतिपूर्ति र घाइतेहरूको निःशुल्क उपचारको तत्काल व्यवस्था मिलाउनसमेत माग गरिएको छ।
राजनीतिकरण नगर्न आग्रह र स्थानीय समितिलाई निर्देशन
रास्वपाले यो दुःखद र संवेदनशील घटनालाई कुनै पनि राजनीतिक स्वार्थ वा बहानामा राजनीतिकरण नगर्न सम्पूर्ण राजनीतिक दल तथा सम्बद्ध पक्षहरूसँग विशेष आग्रह गरेको छ।
पार्टी शान्ति, न्याय र सामाजिक सद्भावको पक्षमा निरन्तर अडिग रहेको दोहोर्याउँदै संवादका माध्यमबाट शान्तिपूर्ण समाधान खोज्न रास्वपा तत्पर रहेको जनाएको छ। यसका साथै, स्थानीय तहमा शान्ति र सामाजिक सद्भाव पुनः कायम राख्न सहयोगी र जिम्मेवार भूमिका निर्वाह गर्न पार्टीका स्थानीय समितिका सम्पूर्ण सदस्यहरूलाई विज्ञप्तिमार्फत विशेष निर्देशन दिइएको छ।
