संजय यादव, गोलबजार, सिरहा
मंसिर ३०, मंगलबार
जनता समाजबादी पार्टी नेपालका बरिष्ठ नेता अशोक कुमार राईले अहिले मुलुकमा कडा संघर्ष र आन्दोलनले संघिय लोकतान्त्रिक गणतन्त्र आए पनि नेकपाको सरकारमा जनताको शासन होईन, खडगप्रसाद ओलीको कुशासन आएको बताए । बरिष्ठ नेता राईले मुलुकमा शान्ति सुरक्षा खतम भईसकेको अवस्था छ, भ्रष्टाचार, बलत्कार जस्ता जघन्य अपराध दिनप्रतिदिन बढदै जनता निरास हुदै गईरहेकोले नेकपाको सरकार पूर्ण असफल भईसकेको बताए । समाजवादी आदिवासी जनजाती महासंघ प्रदेश २ तदर्थ समितिको आयोजनामा सिरहाको गोलबजारमा आदिवासी जनजाती र मधेशीको पहिचान बिषयक बृहत गोष्ठीमा प्रमुख अतिथिको आसनबाट बोल्दै बरिष्ठ नेता राईले यस्तो बताए । उनले भने, यस्ता असक्षमताहरुलाई तह लगाउँदै जसपा नेपाल अगाडी बढिरहेको बताए । विश्व कोरोना महामारीले जनता अस्तब्यस्त भएको बेला सामान्य मास्क पनि उपलब्ध गराउन नसक्ने असक्षम सरकारको देशमा के काम रहेको नेता राईले भने । बरिष्ठ नेता राईले थपे, बिभेदकारी प्रबृतीलाई अन्तय गरी समानता ल्याउनकै लागि जसपा नेपालको जन्म भएको बताए ।
त्यस्तै प्रदेश २ सरकारका उद्योग, पर्यटन वन तथा बातावरण राज्यमंत्री सुरेश मण्डलले पहिचान र प्रतिनिधित्व दुईटै मधेशी र जनजातीको खतरामा आईसकेको अवस्था रहेको बताए । भएको अधिकार पनि संघ सरकारले कटौती गरेर अगाडी बढदै गईरहेकोले जनतालाई सचेत हुन आग्रह गरे । जसपा नेपालको केन्द्रीय सदस्य समेत रहेका मंत्री मण्डलले भने, लोकतन्त्र र संघियताको बिरोधमा ओली सरकार जोडदार रुपले लागिपरेकोले सरकारलाई सडक र सदनबाट नै सवक सिकाउने बताए । अहिलेको सरकारद्धारा नै राजावादीहरु प्रचालित रहेको समेत मंत्री मण्डलले बताए । मंत्री मण्डलले सम्बोधन गर्दै भने, संघ सरकार प्रदेश २ सरकारलाई असफल बनाउन पुरै ताकत लगाईदिएको बताए । उनले थपे, कूल बजेटको ३ प्रतिशत बजेटमा मुलुकमा रहेको ७ वटा प्रदेश चलिरहेको अवस्था छ, जसमा सबभन्दा कम बजेट प्रदेश २ मै रहेको छ । अनि विकासको कस्तो अपेक्षा गर्ने ? । मंत्री मण्डलले सम्बोधनमै भने, अहिले पार्टीमा समायोजनको काम भईनसकेको अवस्थामा पूर्व राजपा नेपाल र सपा दुईटैको अस्तित्व झल्किनु पर्ने सुझाव दिए । दुईटैलाई समान सहभागिता गराउन पनि सुझाव दिए ।
त्यस्तै जसपा नेपालका कार्यकारिणी समिति सदस्य प्रकाश अधिकारीले बिभेदको अन्त्य गर्न जसपा नेपालको जन्म भएको बताए । पार्टीको बिचारसंग मिल्ने अरु पार्टी वा समूहहरुलाई गोलबन्द हुन पनि नेता अधिकारीले आहवान गरे । बृहत गोष्ठीमा जसपा नेपालका केन्द्रीय सदस्य असेश्वर यादव, शत्रुधन प्रसाद सिंह, हरीनारायण कामती, अजिरमान थापा, उचित बहादुर थापा, केन्द्रीय अनुशासन आयोगका सदस्य डा.जयनारायाण यादव लगायतको नेताहरुको सहभागिता रहेको थियो । गोष्ठीमा उल्लेख्य जसपा नेपालका नेता कार्यकर्ताहरुको उपस्थिति रहेको थियो । कार्यक्रमको अध्यक्षता महासंघ प्रदेश २ तदर्थ समितिका अध्यक्ष नेम्बर राईले गर्नु भएको थियो ।
