राजविराज, असार १८ – मधेशको समृद्ध संस्कृति, रहनसहन र जीवनशैलीको अध्ययन तथा अनुभव सँगाल्न एक दर्जनभन्दा बढी विदेशी विद्यार्थी सप्तरी आएका छन्। अन्तर्राष्ट्रिय भोलेन्टियर सर्भिस कार्यक्रमअन्तर्गत १६ जना विदेशी विद्यार्थी राजविराज आइपुगेका हुन्।
नेपाल युनाइटस संस्थाको समन्वयमा उनीहरू सप्तरी आएका हुन्। तीमध्ये १४ जना ताइवान, एक जना मलेसिया र एक जना भियतनामका विद्यार्थी रहेका छन्। नेपाल युनाइटसका राष्ट्रिय निर्देशक मो. रहमानका अनुसार ती सबै विद्यार्थीहरू ताइवानस्थित नेशनल चुङ सिंग युनिभर्सिटीमा अध्ययनरत छन्।
रहमानका अनुसार विद्यार्थीहरूले यहाँका स्थानीय बालबालिकालाई शिक्षण विधि र खेलकुदमार्फत आफूले सिकेका ज्ञान दिनुका साथै, मधेशको परम्परा, भाषा, भेषभूषा र सामाजिक परिवेशबारे गहिरो अध्ययन गर्नेछन्।
“उनीहरू होटलमा होइन, स्थानीय घरपरिवारसँगै बसेर एउटा सदस्यझैँ अनुभव गर्नेछन्,” रहमानले बताए, “यसले उनीहरूलाई यहाँको संस्कृति नजिकबाट बुझ्न र आत्मसात गर्न सहयोग पुर्याउँछ।”
विद्यार्थी टोली असार १७ गते राजविराज आइपुगेको हो भने उनीहरू असार ३१ गतेसम्म विभिन्न सामाजिक र सांस्कृतिक गतिविधिमा संलग्न हुँदै मधेश क्षेत्रका अनुभव सँगाल्ने कार्यक्रम रहेको छ।
कार्यक्रमले स्थानीय बालबालिकामा शिक्षा र खेलकुदप्रतिको रुचि बढाउने मात्र नभई, अन्तरसंस्कृतिक साझेदारी र अनुभव आदान–प्रदानमा समेत टेवा पुर्याउने विश्वास आयोजकहरूको छ।
