सिरहा, असार १८ – सिरहाको लहान नगरपालिका–११ स्थित पडरिया टोलबाट लागूऔषधसहित दुई जना पक्राउ परेका छन्। गोप्य सूचनाका आधारमा खटिएको जिल्ला प्रहरी कार्यालय सिरहा र इलाका प्रहरी कार्यालय लहानको संयुक्त टोलीले विशेष छापा मारेर लागुऔषध कारोबारमा संलग्न व्यक्तिहरूलाई पक्राउ गरेको हो।
पक्राउ पर्नेमा लहान–११ का २८ वर्षीय मिथलेश चौधरी र २४ वर्षीय राज नन्दन चौधरी रहेका छन्। प्रहरीका अनुसार मिथलेश चौधरीको घरमा गरिएको खानतलासीका क्रममा ११३.९१ ग्राम ब्राउन सुगर (प्लास्टिकसहित), नेपाली रुपैयाँ २ लाख ७५ हजार ३ सय, भारतीय रुपैयाँ १ हजार २ सय ५०, सुनजस्तो देखिने तिलहरी र नेकलेस, डिजिटल तराजु, मोबाइल फोन, कैंची र लागुऔषध कारोबारमा प्रयोग हुने अन्य सामग्रीहरू बरामद गरिएको छ।
त्यसैगरी, राज नन्दन चौधरीको साथबाट १०.७१ ग्राम ब्राउन सुगर, नगद २ हजार १ सय रुपैयाँ र एक थान मोबाइल समेत बरामद गरिएको प्रहरीले जनाएको छ।
दुबै जनालाई पक्राउ गरी जिल्ला अदालत सिरहाबाट पाँच दिनको म्याद थप गरी आवश्यक अनुसन्धान अगाडि बढाइएको प्रहरीले जानकारी दिएको छ।
जम्मा बरामद ब्राउन सुगरको तौल प्लास्टिकसहित १२४.६२ ग्राम र प्लास्टिक बाहेक ११८.६१ ग्राम रहेको छ भने बरामद नगद रकम कुल २ लाख ८६ हजार ७ सय १० रुपैयाँ पुगेको छ।
प्रहरीले लागुऔषध कारोबारविरुद्ध निगरानी अझ कडा बनाउने र नियमित रुपमा कारबाही अभियान सञ्चालन गर्ने जनाएको छ।
