काठमाडौं । तीन हप्ताअघि अफगानिस्तानको सत्ता हत्याएको विद्रोही समूह तालिबान दिनानुदिन क्रुर बन्दै गइरहेको छ । उसले आफ्ना अगाडि रहेका सबैलाई दुस्मन देख्न थालिरहेको छ ।
उक्त क्रममा तालिबानले एक महिला प्रहरीको हत्या गरेको छ । आठ महिनाकी गर्भवती ती महिला सुरक्षाकर्मीको घरमै प्रवेश गरेर बन्दुकधारी समूहले उनका श्रीमान र छोराछोरीको सामुन्ने हत्या गरेको हो । गोली हानी हत्या गरिएकी ती महिलाको शरीर र अनुहारसमेत क्षत विक्षत अवस्थामा फेला पारेको जनाइएको छ ।
अफगानिस्तानमा पछिल्लो समय अधिकार माग गर्दै महिलाहरुले गरेको प्रदर्शनमा ती बानू निगार नामकी महिला प्रहरी अधिकृत संलग्न भएको आशंकामा मारिएको हुन सक्ने जनाइएको छ ।
तालिबानले महिला अधिकारको समर्थनमा भएको प्रदर्शनमा संलग्नहरुलाई खोजी खोजी कारबाही गर्न थालेको छ । तीन हप्ताअघि तालिबानले काबुलमा कब्जा गरी सत्ता हत्याएको छ । त्यसयता अफगानिस्तान अशान्त भइरहेको छ ।
तालिबानले ती बानूको हत्याबारेमा जाँच गर्ने बताएको बीबीसीले लेखेको छ । बीबीसीले नै बानूको तस्वीर सार्वजनिक गरेको थियो । शनिबार राति उनकै घरमा बानूको हत्या भएको थियो ।
परिवारले शनिबार राति तीन हतियारधारी तालिबान उनको घरमा घुसेर परिवारका सदस्यलाई बाँधेर उनीहरुकै सामुन्ने बानूलाई मारेका हुन् । आक्रमणकारीले अरबी भाषामा कुराकानी गरेका थिए ।
