कोरोनाको डर र त्रास यति हदसम्म पुगेको छ की अस्पतालमा डाक्टर पनि अब पन्छीन थालेका छन् ।
धनुषा : प्रदेश नं. २ को अस्थायी राजधानी जनकपुरमा पुनः एक युवक उपचारको अभावमा मृत्यू भएको छ ।
धनुषाको सबैला नगरपालिका वडा नं. २ बस्ने अन्दाजी बर्ष ३५ का प्रमोद कुमार महतोले अस्पतालमा उपचार नपाएर दम तोडेका हुन् । प्रादेशिक अस्पताल जनकपुरका डाक्टरहरुले कोरोनाको डरले उनलाई समयमा उपचार नगरेपछि उनको ज्यान गएको हो ।
मँगलबार मात्र उनका परिवारजनले अस्पतालमा डायग्लोसिस नगरिदिएको गुनासो गरेको २४ घण्टा नबित्दै उनको ज्यान गएको हो । महिनौदेखि विरामी भएर सिकिस्त भएका महतो उपचारको लागि जनकपरको प्रादेशिक अस्पतालमा उपचाररत थिए ।
उपचाररत महतोको डायग्लोसिस गरेको भए अहिले उनी जिउँदो हुन्थ्यो तर, अस्पतालका चिकित्सकहरुले कोरोनाको बहाना देखाउँदै उनलाई डायग्लोसिस समयमा नगर्दा छटपटाउँदै दम तोडेका हुन् ।
मँगलबार मात्र सँचारकर्मी विपी साहले उनको २१ सेकेण्डको भिडियो समाजिक सँजालमा पोष्ट गर्दै उनको उपचारको लागि सबै निकायसँग गुहार गरेका थिए । तर, सरोकारबाला भने कसैले सुनेनन् । कोरोनाको डर र त्रास यति हदसम्म पुगेको छ की अस्पतालमा डाक्टर पनि अब पन्छीन थालेका छन् ।
प्रदेश नं. २ का मुख्यमन्त्री मो. लालबाबू राउतले उपचार नगर्ने स्वास्थ्य सँस्था विरुद्ध अदालत जाने मिडियामा भनेपनि आफ्नै प्रदेशको प्रादेशिक अस्पतालमा उपचार नपाएर एक युवकको ज्यान गएपछि कस्तो एक्सन लिने भने सर्वसाधारणहरु प्रश्न गरेका छन् ।
उनीहरुले प्रादेशिक अस्पतालको सम्बन्धित चिकित्सकलाई कारवाही गर्ने की मेडिकल सुपरिटेन्डेन्टलाई कारवाही गर्ने भनेर प्रश्न उठाएका हुन् । प्रादेशिक अस्पतालमा राजनीति सहित जातीगत राजनीति पनि हावी भएको छ । जसको बीचमा आम सर्वसाधारण दिनहुँ पिसिएका हुन् ।
