काठमाण्डौं : नेपालको राष्ट्रिय झण्डा कुनै पनि बहानामा च्यात्न वा जलाउन नपाइने कानूनी प्रावधान छ । तर एउटा नेपाली गित सुटिङ गर्दा राष्ट्रिय झण्डा जलाएको फोटो यतिबेला सामाजिक सञ्जालमा भाइरल बनेको छ ।
विटु मिश्र भाट्सले आफ्ना फेसबुकमा राष्ट्रिय झण्डा जलाएको एउटा तस्विर अपलोड गरेका छन् । दुई युवती बाँया साइडमा र एक युवक दायाँ साइडमा उभिएको छ भने एक युवक गाडिएको ठूलो राष्ट्रिय झण्डा जलाइरहेको तस्विरमा देखिन्छ ।
भाट्सले तस्विरसँगै लेखेका छन्–
मधेशी देशको सत्ता पक्षबाट असन्तुष्ट थिए र अहिले पनि छँदैछ । मधेशीले देशको राष्ट्रिय झण्डा कहिल्यै यसरी जलाएको थिएन र जलाउँदैन पनि !
देशको झण्डामा कुना तलमाथी भएको भरमै मुख्यमन्त्री लालबाबू राउतको राजिनामा समेत माग गर्ने राष्ट्रवादीहरुको प्रतिक्रिया खै त ?
कडा कार्वाही को माग गर्दछु !
यस्तै हरि पौडेलले फेसबुकमा नेपालीको राष्ट्रिय झण्डा जलाउने र जात जातमा फाटो ल्याउनेलाई कारबाही गर्न नेपाल प्रहरीसँग माग गरेका छन् ।
उनको स्टाटस यस्तो छ–
नेपालको झण्डा जलाउने अधिकार कसले दियो ? नेपालको झण्डा हाम्रो शान हो । नेपालको झण्डा जलाउने र जात जातमा फाटो पार्न खोज्नेलाई कडा भन्दा कडा कारबाही होस् । नेपाल पुलिस ।
कहाँबाट आयो तस्विर ?
सामाजिक सञ्जालमा अहिले भाइरल भएको उक्त तस्विर मंगोल होप अफिशियल नामको युट्युव च्यानलमा अपलोड भएको भिडियाबाट लिइएको छ । उक्त भिडियो : Mongolhop- Deshdrohi [Official Video] Mongol Gyalz Lee शिर्षकमा युट्युवमा राखिएको छ ।
भिडियो गितमा देखिएको कलाकारको पहिचान खुल्न सकेका छैन । यद्दपी उक्त भिडियोको सुटिङ मकवानपुरको बागमती गाउँपालिका २ सल्लेनीस्थित विष्णु आधारभुत विद्यालयमा गरेको देखिन्छ । सोमवार युट्युवमा अपलोड भएको उक्त भिडियो यो समाचार तयार पार्दासम्म २१ हजार २१ जनाले हेरिसकेका छन् ।
यतिबेला सामाजिक सञ्जालमा उक्त भिडियो गित र भिडियोमा जलाएको नेपालको राष्ट्रिय झण्डाको स्क्रिन सट भाइरल भएको छ । झण्डा जलाउनेहरुको पहिचान गरी कडा कारबाही गर्न फेसबुक मार्फत धेरैले माग गरिरहेका छन् ।
