अभियानको नवौं दिनसम्म १ लाख ५८ हजार बढीले खोप पाए
काठमाडौं । नेपालमा ६ महिना भन्दाबढी समय स्तनपान गराइरहेका आमाहरुलाई पनि कोरोना विरुद्धको खोप दिइने भएको छ । स्वास्थ्य तथा जनसंख्या मन्त्रीको उपस्थितिमा सम्बन्धित विभागको प्रमुख तथा खोप विज्ञहरुको उपस्थितमा बसेको बैठकले ६ महिनाभन्दा बढी स्तनपान गराइरहेका आमाहरुलाई पनि खोप दिने निर्णय गरेको हो ।
राष्ट्रिय खोप सल्लाहकार समितिको सिफारिस बमोजिम उक्त निर्णय गरिएको स्वास्थ्य मन्त्रालयले जनाएको छ । साथै बैठकले त्रिभुवन अन्तराष्ट्रिय विमानस्थल र अन्तराष्ट्रिय सीमाका प्रवेश बिन्दुमा काम गर्ने कर्मचारी र सुरक्षाकर्मी, कारागारमा बस्ने व्यक्ति र छुटेका स्वास्थ्यकर्मीलाई अबको ३ दिनभित्र खोप लगाइसक्ने निर्णय गरेको छ ।
खोप अभाव भएमा अन्तर जिल्ला र प्रदेश आपूर्ति केन्द्रबाट उपलब्ध गराइने भएको छ । खोप अभियान सुरु भएको नवौं दिनसम्म १ लाख ५८ हजार ४८७ जनाले खोप लिएका छन् । मन्त्रालयका अनुसार प्रदेश नम्वर १ मा २१ ह्जार ७५४, प्रदेश २ मा २१ ह्जार १८५, बागमती प्रदेशमा ५५ हजार ५०४, गण्डकी प्रदेशमा १७ हजार २६७, लुम्बिनीमा २३ हजार ७९८, कर्णाली प्रदेशमा ८ हजार ७२ र सुदुरपश्चिममा १० हजार ९०७ जनाले खोप पाएका छन् ।
