काठमाडौं । नेपाल कम्युनिस्ट पार्टी (नेकपा) ले देशको बद्लिदो राजनीतिक अवस्थाबारे श्वेतपत्र जारी गर्ने भएको छ ।
शुक्रवार ललितपुरमा आयोजित पत्रकार भेटघाटमा अध्यक्ष पुष्पकमल दाहालले २०७४ सालको आम निर्वाचानबाट जनताको दुई तिहाइ जनमत प्राप्त गरेदेखि प्रतिगमनविरुद्ध आन्दोलनसम्मका विषय समेटेर श्वेतपत्र जारी गर्ने योजनामा नेकपा रहेको बताउनुभएको हो ।
समान सोच र संकल्प भएकाले निर्वाचनका समयमा आफ्नै प्रस्तावमा वाम गठबन्धन गरेको बताउँदै उहाँले पार्टी एकताको प्रस्तावक समेत आफै रहेको दाबी गर्नुभयो । तर बहुमत जनताले दिएको जनादेश अनुसारको काम गर्न नसकेकोमा आत्मलोचना गर्नुपर्ने उहाँको भनाइ थियो । त्यसैले आत्मालोचनासहित यस बीचमा के के भए ? भन्नेबारे देश र जनतालाई जानकारी गराउन छिट्टै श्वेतपत्र जारी गरिने अध्यक्ष दाहालले बताउनुभयो ।
उहाँले नेकपाले अहिले जारी राखेको प्रतिगमनविरुद्धको आन्दोलन लोकतन्त्र र संविधानवादको भएको जिकिर गर्दै यसमा सफल र असफल भन्ने कुरा नहुने तर्क गर्नुभयो । प्रतिनिधिसभा विघटन गर्ने र संवैधानिक निकायहरुमा बलजफ्ती नियुक्तिको सरकारको निर्णय प्रतिगमन र लोकतन्त्रमाथिको घात भएको उहाँको भनाइ थियो । ओली सरकारले निरंकुशता लाद्न खोजेपछि अहिले जनता जागेको अवस्था रहेको उहाँले दाबी गर्नुभयो । केपी शर्मा ओली एकजनाले सबै नीति,नियम र सिद्धान्तलाई हातमा लिएर गुण्डराज गर्न खोजेपछि तुरुन्त प्रतिकार गर्न विहीवार आमहड्ताल गरिएको उहाँले प्रष्ट पार्नुभयो । जनताको स्वस्फूर्त साथले बन्द सफल भएको उहाँको दाबी थियो । बन्दप्रति सबै जनताको असहमति रहेको अवस्थामा फेरि बन्द जस्तो अलोकप्रिय कार्यक्रम हुन्छ कि हुँदैन भन्ने पत्रकारको प्रश्नको जवाफमा अध्यक्ष दाहालले भविष्यमा पनि आमहड्ताल हुनसक्ने बताउनुभयो । तर हरेक हड्ताल नितान्त जनताको हुने बताउदै उहाँले नेकपा पार्टी एक्लैले अब उपरान्त हड्ताल नगर्ने बताउनुभयो ।
माधव,प्रचण्ड र ओली गौण :
अध्यक्ष दाहालले अहिलेको आन्दोलन कुनै पार्टी वा व्यक्तिको नभएको प्रष्ट पार्नुभयो । माधवकुमार नेपाल,पुष्पकमल दाहाल वा केपी शर्मा ओली गौण हुन् देश,जनता,लोकतन्त्र,संविधान,विधि र विधान मूख्य कुरा रहेको अध्यक्ष दाहालको भनाइ थियो ।
नेकपाको आन्दोलनमा प्रमुख प्रतिपक्षी काँग्रेसको समर्थन किन नभएको भन्ने अर्को प्रश्नमा अध्यक्ष दाहालले भन्नुभयो–हामीलाई काँग्रेसको पूर्ण समर्थन छ जस्तो लाग्छ । प्रवक्ता विश्वप्रकाश शर्माले विज्ञप्ति नै जारी गरेर प्रतिगमनको विरोध गर्नुभएको छ । तर जहाँसम्म सभापति शेरवहादुर देउवाजीको कुरा छ, शायद उहाँको आफ्नै टेक्निकल समस्या होलान् ।
पत्रकार भेटघाटमा अध्यक्ष दाहालले जनताबाट लोभलाग्दो जनादेश पाए लगत्तै देश र जनतासँग गरेका संकल्प अनुसार सरकार सञ्चालन गर्न खोज्दा प्रधानमन्त्री केपी शर्मा ओलीसँग विमति भएको बताउनुभयो । त्यही विषयमा पार्टीभित्र अल्पमतमा परे पनि ओलीले सरकार छोड्न नमानेपछि उहाँँको त्यही निरंंकुश शैली र अहंकारविरुद्ध पार्टीभित्र अन्तरसंघर्ष गर्नुपरेको अध्यक्ष दाहालको भनाइ थियो । अन्तरसंघर्षमा पनि ओली एक्लो परेपछि प्रतिगमनको निर्णयमा पुगेको दाहालको दाबी थियो ।
देशमा कयामत हुन्छ :
प्रतिगमनको निर्णयविरुद्ध अदालतमा वहस जारी रहेको र निर्वाचन आयोगमा दलको नाम र चुनाव चिन्हको विषयमा रहेको विवादको प्रश्नमा अध्यक्ष दाहालले भन्नुभयो–हामीलाई सर्वोच्च अदालत र निर्वाचन आयोगप्रति पूर्ण भरोसा छ । हाम्रो भरोसामा तलमाथि भयो भने कयामत हुन्छ ।
अध्यक्ष दाहालले अहिले जारी प्रतिगमनविरुद्धको आन्दोलनको विशेषता युवा सहभागीता रहेको बताउनुभयो । अहिलेको आन्दोलनमा युवा पुस्ता बढी जोडिएका छन् । अर्थात बहुमत युवा फेरि एकपटक लोकतन्त्र र देशका लागि जागेको छ । हामीले गर्न चाहेको पनि युवाकै निम्ति हो । हामी आफू पनि युवा बन्ने कोशिसमा छौं । त्यसैले युवासँग काँधमा काँध मिलाएर सडक र धर्नामा सँगसँगै छौं ।
देशको पछिल्लो परिस्थिति हेर्दा देशमा कम्युनिस्ट आन्दोलनलाई विभाजित गर्ने खतरा बढेको बताउदै उहाँले विभाजनको मतियार ओली नै रहेको दाबी गर्नुभयो । तर यति हुँदा हुँदै पनि मुलुकमा फेरि पनि कम्युनिस्टको बहुमत सम्भव छ । यसका लागि पहलकदमी लिन र वातावरण सिर्जना गर्न सक्छौं भन्ने आत्मविश्वास छ,अध्यक्ष दाहालले बताउनुभयो ।
ओलीले गृहयुद्ध चाहेका छन्
अध्यक्ष दाहालले ओलीले फेरि देशमा गृहयुद्ध चाहेको दाबी गर्नुभयो । जनताले बनाएको संविधान कुल्चनु जनताको छातिमा कुल्चनु जस्तै रहेको बताउदै उहाँले यसबाट शान्ति भंग हुने धारणा राख्नुभयो । शन्ति भंग भए देश दुर्घटनामा जाने र त्यसबाट अतिवाद जन्मिने उहाँको तर्क थियो ।
अब तेस्रो जन आन्दोलन हुन्छ कि हुँदैन भन्ने कुरा ओलीमा निर्भर रहेको अध्यक्ष दाहालको भनाइ थियो । प्रतिगमन सचिन्छ कि सचिदैन ? लोकतन्त्र र शान्तिको रक्षा हुन्छ कि हुँदैन ? त्यसैमा अर्को जनआन्दोलनको भविष्य निर्भर रहेको उहाँको भनाइ थियो ।
