काठमाडौँ । राष्ट्रपति विद्यादेवी भण्डारी र प्रधानमन्त्री केपी शर्मा ओलीबीच भेटवार्ता भएको छ ।
राष्ट्रपति भण्डारीलाई भेटन् प्रधानमन्त्री ओली आइतवार साँझ शीतल निवास पुग्नुभएको राष्ट्रपति निवास स्रोतले जनाएको छ ।
संवैधानिक परिषद् सम्बन्धी कानुन अध्यादेशमार्फत संशोधन गरेर गरेको नियुक्तिबारे छलफलका लागि प्रधानमन्त्री ओली राष्ट्रपति निवास पुग्नुभएको बताइएको छ ।
मंसिर ३० गते अध्यादेशमार्फत ऐन संशोधन गरेपछि ओलीको अध्यक्षतामा प्रधानन्यायाधीश चोलेन्द्रशमशेर जबरा र राष्ट्रिय सभा अध्यक्ष गणेशप्रसाद तिमिल्सिना सदस्य रहेको संवैधानिक परिषद्को बैठकले अख्तियार प्रमुखमा प्रेम राई र मानवअधिकार आयोगमा टोपबहादुर मगरसहित ११ वटा संवैधानिक निकायमा ३८ जना पदाधिकारी सिफारिस गरेको थियो।
संयुक्त सदन कार्य सञ्चालन नियमावलीअुनसार संसदले प्रत्र प्राप्त भएको ४५ दिनभित्र कुनै निर्णय नगरेमा स्वतः नियुक्ति हुन सक्ने प्रावधान छ।
सभामुख अग्नि सापकोटाले भने संवैधानिक नियुक्ति विवादास्पद रहेको भन्दै फिर्ता पठाउनुभएको छ । नियुक्ति सिफारिस सम्बन्धमा अदालतमा मुद्दा विचाराधीन रहेकाले नियुक्ति सिफारिस संवैधानिक परिषदमै फिर्ता पठाएको सभामुख सापकोटाले बताउनुभएको छ ।
सभामुख सापकोटाले नियुक्ति सिफारिस फिर्ता गरेको बोधार्थ राष्ट्रपतिको कार्यालय, प्रधानमन्त्रीको कार्यालय, प्रधानन्यायाधीश चोलेन्द्रशम्शेर जबरा, राष्ट्रियसभाका अध्यक्ष र प्रमुख प्रतिपक्ष दलका नेतालाई पठाउनुभएको छ ।
नियुक्तिको प्रस्ताव फिर्ता पठाएर सभामुख सापकोटाले संवैधानिक नियुक्ति रोक्ने प्रयास गर्नुभए लगत्तै त्यसबारेमा परामर्शका लागि प्रधानमन्त्री ओलीले राष्ट्रपतिलाई भेट्नु भएको बताइएको छ । प्रधानमन्त्री ओली जसरी भए पनि संवैधानिक नियुक्तको प्रस्ताव सदर गराएरै छोड्ने अडानमा रहनुभएको छ ।
