महेश सिंह लहान सिरहा –भूमि अधिकारसम्बन्धी वकालतलाई प्रभावकारी बनाउन समुदायका अगुवाहरूको क्षमता अभिवृद्धि गर्ने उद्देश्यसहित तीनदिने तालिम कार्यक्रम सम्पन्न भएको छ। कार्यक्रमले वकालत रणनीति विकास, शक्ति विश्लेषण तथा निर्णय प्रक्रियामा प्रभाव पार्ने सीप विकासमा केन्द्रित रहेको आयोजकले जनाएको छ।
महिला एकता समाज द्वारा आयोजित उक्त तालिम राजाबास मा सम्पन्न भएको हो। कार्यक्रममा सिरहाको धनगढीमाई नगरपालिका र लक्ष्मीपुर पतारी गाउँपालिका का समुदायस्तरका अगुवाहरूको सहभागिता रहेको थियो।
कार्यक्रममा करिब ३० जना सहभागीले वकालत अभियानको डिजाइन, सरोकारवालासँग समन्वय तथा निर्णय लिने तहसम्म पहुँच विस्तारका विषयमा व्यवहारिक ज्ञान हासिल गरेका थिए। सहभागीहरूबीच भूमि अधिकारका मुद्दामा संगठित रूपमा आवाज उठाउने आत्मविश्वास अभिवृद्धि भएको जनाइएको छ।
संस्थाकी कार्यकारी निर्देशक भगवती अधिकारी ले सिरहाका विभिन्न स्थानीय तहमा यस्ता कार्यक्रम सञ्चालन भइरहेका जानकारी दिँदै यसले समुदायमा अधिकारप्रति सचेतना र सहभागिता बढाएको बताइन्। सामाजिक परिचालक सरस्वती शर्मा का अनुसार तालिम प्रभावकारी रूपमा सम्पन्न भएको र सहभागीहरूले सिकेका सीप व्यवहारमा लागू गर्ने प्रतिबद्धता जनाएका छन्।
आयोजकका अनुसार यस्ता कार्यक्रमले भूमि अधिकारको क्षेत्रमा स्थानीय समुदायलाई सशक्त बनाउँदै दीर्घकालीन रूपमा न्याय र समानतामा टेवा पुर्याउने अपेक्षा गरिएको छ।
