सिरहा । सिरहा धनगढीमाई निवासी समाजसेवी अशोक कुमार खड्काले देशमा बढ्दै गएको मनोवैज्ञानिक विभाजनप्रति गम्भीर चिन्ता प्रकट गरेका छन्। उनको तर्कमा, 2046 सालदेखि 2082 सालसम्मका विभिन्न राजनीतिक, सामाजिक र सांस्कृतिक उतार–चढावले नेपाली समाजलाई बिस्तारै टुक्रा–टुक्रामा विभाजित गर्दै लगेको छ।
खड्काका अनुसार, कहिले तन्त्रको नाममा, कहिले जातजातिको नाममा, कहिले धर्म–संस्कृति वा भूगोलको नाममा र अहिले उमेर समूहका नाममा समेत समाज विभाजित हुन थाल्नु चिन्ताजनक अवस्था हो।
अशोक खड्का भन्छन्, “हामी तन्त्र, जाति, धर्म, संस्कृति, मधेसी–पहाडी, प्रदेश, जेन एक्स–जेन जेड जस्ता नाममा टुक्रा टुक्रा भएर बसेका छौं। यो निरन्तरता रहिरह्यो भने देशलाई कसैले अघि बढाउन सकिँदैन।”
अहिलेको सबैभन्दा ठूलो आवश्यकता आपसमा उनेर एक हुने हो।
“हामी एउटै धागोमा उनेर एकता कायम गर्न सकेनौं भने, हामी र हाम्रा सन्ततिहरू सधैं अरूका लागि मात्र पसिना बगाउने मजदुर बन्न बाध्य हुनेछौं। देश नै पराधीनजस्तै बन्न सक्छ,” खड्काले चेताएका छन्।
अशोक खड्का सामाजिक क्षेत्रमा सक्रिय नाम हो। उनले वर्षौंदेखि असहाय, अपांगता भएका व्यक्ति, विद्यार्थी, किसान र युवाहरूको पक्षमा विभिन्न कल्याणकारी काम गर्दै आएका छन्। समाजप्रतिको उनको समर्पणले उनको आवाजलाई अझै विश्वसनीय र प्रभावशाली बनाएको छ।
खड्का भन्छन्, “देशलाई बलियो बनाउने कुरा धेरथोर कसैले बोक्ने बोझ होइन। एकतामा बस्ने, विभाजन नफैलाउने, भिन्नता स्वीकार गर्ने र देशलाई पहिलो प्राथमिकता दिने हाम्रो बानी नै राष्ट्रनिर्माणको सबैभन्दा ठूलो आधार हो।”
अशोक खड्काको यो भनाइ अहिलेको परिस्थितिमा समाज र राष्ट्रलाई एउटै सूत्रमा बाध्ने संदेशको रूपमा खास गरी युवा पुस्ता हेरिरहेको छ ।
यो केवल चेतावनी मात्र होइन, एक जिम्मेवार नागरिकको मनको पीडा र देशप्रेमको आवाज पनि हो।
