मुगु। मुगुको पश्चिमी भेगमा पर्ने खत्याडगाँउपालिका वडा नम्बर १० का कृषकले लगाएको धानमा बाला नलागेपछि खेतमै आगो लगाएका छन्।
खडेरी परेर धान उत्पादन नभएपछि कृषक आक्रोशित बनेका हुन्। गत जेठ-असारमा खत्याडगाँउपालिका वडा नम्बर १० ह्रायाङ्खु गाँउका कृषकले लगाएको धानमा फल नलागेपछि कृषक चिन्तित बनेका हुन्। उक्त क्षेत्रका एक सय २५ घर परिवारले धान लगाएको खेतमा आगो लगाएका हुन्।
हयाङ्खु बासीहरुको मुख्य खाद्यान्न बाली धान हो। भुवा अर्थात पाखे खेत गर्ने जमिन निकै कम भएको हुँदा बर्षभरी धान खतीमार्फत जीवन निर्वाह गर्दै आएका कृषक खडेरीको मारमा परेका हुन्।
खत्याड गाउँपालिका १० का ६५ बर्षीय कृषक धनलाल रोकायाका अनुसार धान रोप्ने समयमा आकाशबाट पानी परेन, खडेरी पर्यो अनि अनि बाला लागेन। ‘धानबालीमा फल छैन्, सिंचाइको कुलो बाढीले बगायो त्यसैले यसबर्ष भोकमरी होला जस्तो छ। भारत जाने अवस्था छैन, अब परिवारको विचल्ली हुनेभयो। यस्तो अवस्थामा तीन तहको सरकारबाट राहत पाउने आशामा छौं,’ उनले भने।
अर्का कृषक चन्द बहादुर रोकाया अर्को बर्ष धानको विउकै अभाव हुने दुखेसो पोख्छन्। पालिका अध्यक्ष अज बहादुर शाहीका अनुसार समयमा आकाशे पानी नपर्दा धान बालीमा खडेरी भएको हो। यस्तो अवस्थामा स्थानीय, प्रदेश र केन्द्रीय सरकारबाट राहतका लागि पहल गर्ने उनले बताए।
