काठमाडौं । नेपाल प्रहरीका आईजीपी चन्द्र कुबेर खापुङ्गले नेपाल प्रहरीको विकल्प भनेको अझ सुधारिएको नेपाल प्रहरी नै भएको बताएका छन् । एआईजीमा बढुवा भएका चार जना प्रहरी अधिकारीहरुलाई दर्ज्यानी चिन्हद्वारा सुशोभन कार्यक्रमलाई सम्बोधन गर्दै उनले यस्तो बताएका हुन् ।
बढुवा भएका प्रहरी अधिकृतहरूलाई बधाई तथा सफल कार्यकालको शुभकामना व्यक्त गर्दै आईजीपी खापुङ्गले संगठन प्रति पुर्याएको योगदान, जिम्मेवारी निर्वाहको क्रममा प्रदर्शित पेशागत दक्षता एवम् कार्यकुशलताको मूल्याङ्कनको आधारमा पदोन्नति भएको बताए ।
कार्यक्रममा उनले प्राप्त पद र जिम्मेवारीलाई आफ्नो अनुभव, विवेक र नेतृत्वबाट समग्र संगठनको विकास र संगठनको वृहत्तर हितका लागि सामूहिक भावनाका साथ कार्यसम्पादन हुने विश्वास व्यक्त गरे ।
आईजीपी खापुङ्गले विगतमा भएका कमी कमजोरीको विश्लेषण गरी अझ परिष्कृत र नागरिकमैत्री प्रहरी सेवा प्रदान गर्न उच्च मनोबलका साथ कार्य सम्पादन गर्न उपस्थित प्रहरी कर्मचारीहरूलाई निर्देशन समेत दिए ।
समारोहमा पदोन्नति हुनुभएका प्रहरी अधिकृतहरूको तर्फबाट मन्तव्य व्यक्त गर्दै प्रहरी अतिरिक्त महानिरीक्षक सुशिल सिंह राठौरले नेपालको संविधान र विद्यमान ऐन कानूनको परिधि भित्र रही देशमा शान्ति सुव्यवस्था एवम् कानून कार्यान्वयन गर्न अझ धेरै उत्प्रेरित भई व्यावसायिक निष्ठाका साथ इमानदार एवम् कर्तव्यनिष्ठ भई आ–आफ्ना जिम्मेवारी बहन गर्ने प्रतिवद्धता व्यक्त गरे ।
नेपाल सरकार मन्त्रिपरिषद्को २०८२ असोज २३ गतेको निर्णयअनुसार प्रहरी नायव महानिरीक्षक (डिआईजी)बाट प्रहरी अतिरिक्त महानिरीक्षक (एआईजी) पदमा पदोन्नति भएका नेपाल प्रहरीका चार एआईजीले दर्ज्यानी चिन्ह (फूली) लगाएका हुहन् ।
एआईजीमा बढुवा भएका सुशीलसिंह राठौर, उमाप्रसाद चतुर्वेदी, हिमालय श्रेष्ठ र डम्बरबहादुर विक आज फूली लगाएका हुन् ।
लगाउन अघि नै चारै जना एआईजीको पदस्थापन भइसकेको छ । हिजो बसेको मन्त्रीपरिषद् बैठकले चारै जना डिआईजीलाई एआईजीमा बढुवा गर्ने निर्णय गर्दै पदस्थापन समेत गरेको थियो ।
जस अनुसार राठौरको अपराध अनुसन्धान विभाग, चतुर्वेदीको कार्य बिभाग, श्रेष्ठको प्रशासन बिभाग र बिकको प्रदेश समन्वय बिभागमा पदस्थापन भएको छ ।
