राजविराज । प्राप्त अधिकारको संरक्षणका लागि एकजुट हुनु पर्ने कार्यक्रमका सहभागीहरुले जोड दिएका छन् ।
बुधबार तराई मधेस महिला फाउण्डेशन नेपाल सप्तरीद्वारा देशको परिबर्तित अवस्थामा महिला अधिकार विषयक अन्तरक्रिया तथा बडादशै, दिपावली छठ पर्वको अवसरमा आयोजित शुभकामना आदानप्रदान कार्यक्रमका सहभागी बक्ताहरुले अधिकार सुनिश्चितताको लागि एकजुट हुनुको विकल्प नरहेको बताएका हुन् ।
कार्यक्रममा बोल्दै वक्ताहरूले जेनजी आन्दोलनले देशलाई नयाँ मोडमा लगेको तथा यस्तो संक्रमणकालीन अवस्थाको फाइदा उठाएर परिबर्तन विरोधी शक्ति सक्रिय भएकोले आन्दोलनको बलमा प्राप्त अधिकारलाई उपयोग गर्दै अग्रगामी शक्तिहरु एकजुट हुनुको विकल्प नरहेको उनीहरुको भनाइ थियो ।
तराई मधेश महिला फाउन्डेशन नेपालकी अध्यक्ष तथा महिला अधिकारकर्मी सुनिता साहले जेनजीले उठाएको भ्रष्टाचारविरोधी आन्दोलनबाट प्राप्त उपलब्धिलाई संस्थागत गर्न सबै जागरूक बन्नुपर्नेमा जोड दिइन् ।
सुनिता साहको अध्यक्षतामा सम्पन्न कार्यक्रममा जिल्ला समन्वय समिति प्रमुख शिव नारायण साह, नेपाल पत्रकार महासंघका पूर्वअध्यक्ष धिरेन्द्र प्रसाद साह, महिला अधिकारकर्मी अनुराधा देवी साह, सामुदायिक सेवा केन्द्र सप्तरीका अध्यक्ष धिरेन्द्र दास, नेपाल प्रेस युनियन सप्तरीका अध्यक्ष विनय कर्ण, प्रेस सेन्टरका अध्यक्ष बिन्दु यादव, शिक्षिका बन्दना मिश्र, पत्रकार बृतजमान तामाङ लगायतले शुभकामना मन्तव्य व्यक्त गरेका थिए ।
