धनगढीमाई–१०, सिरहा | सामाजिक सेवाको प्रतीक बनेको पद्मोदय फाउन्डेसन आज गहिरो चोटमा छ। अकल्पनीय र अमानवीय ढंगले भएको एक योजनाबद्ध आक्रमणले फाउन्डेसनको आत्मा र अस्तित्व नै हल्लाइदिएको छ।
आइतवारको मध्यरात। सबथोक शान्त थियो। तर त्यो शान्ति केही बेरमै छियाछिया बन्यो, जब मोटरसाइकलमा आएका करिब ६ जना नकाबपोशहरू फाउन्डेसनको कार्यालय रहेको लवकुश सामुदायिक भवनमा पुग्छन्। ताल्चा फोडेर कार्यालयभित्र पसेपछि उनीहरूले दराजमा रहेका फाउन्डेसनका बहुमूल्य कागजात, सामाजिक तथा कल्याणकारी योजनाका फाइलहरूमा पेट्रोल छर्किएर आगजनी गरेका छन् |
धधकीएको त्यो आगो केवल कागज जलाउने आगो थिएन। त्यो आशाको आगो थियो, जसले गरीब, विपन्न, अपांग र बेसहारा मानिसको जीवनमा उज्यालो ल्याउने सपना जलाइदियो। फाउन्डेसनले वर्षौंदेखि संचित गरेका योजना, रिपोर्ट, तथ्यांक र समाजसेवामा अगाडि बढाउने खाका क्षणभरमै खरानीमा परिणत भयो।
सिर्फ कागज जलेन, हजारौ दिन दु:खीको भरोसा र सपना जलेको हो।
स्थानीय स्तरमा कृषि पशुपालन लगायतको क्षेत्रमा जनजीविका उकास्न क्रियाशील रहेको लवकुश बहूद्देश्यीय सहकारी संस्थाको कुर्सी, टेबल लगायत कार्यालयको सामग्रीहरु समेत लुटिएको छ। यो केवल चोरी मात्र होइन, यो सामाजिक सेवामाथिको अमानवीय प्रहार हो – एक कायरहरूद्वारा गरिएको घृणित प्रयास हो।
अध्यक्ष दिपेन्द्र महतो, आफ्ना आँखा रसाउँदै भन्छन्:
“हामी गरीब बिपन्न बालबालिकालाई किताब, कलम दिन खोजिरहेका थियौं, उनीहरूले हाम्रा फाइल जलाए। हामी अपांगहरूलाई हिँड्न व्हीलचेयर दिन खोजिरहेका थियौं, उनीहरूले हाम्रा योजना खरानी बनाए। उनीहरुले हाम्रो कार्यालय मात्र होइन हजारौ बालबालिकाको सुन्दर भविष्य जलाए, तर हाम्रो मनोबल चाहिँ कसैले जलाउन सक्दैन।”
बिहानको उज्यालोले जब जलेका कागज, टुटेका दराज र लुटिएको सहकारी देख्यो, तब गाउँका आँखामा आश्चर्य होइन – आक्रोश थियो।
फाउन्डेसनले विगतमा विद्यालयहरूलाई सहयोग, बृद्धबृद्धाहरूलाई सम्मान, अपांगता भएका नागरिकलाई जीवनको सहारा, अनि रक्तदान, स्वास्थ्य परीक्षणदेखि लिएर शिक्षा सुधारसम्मका कार्यक्रम गरिरहेको थियो। यस्तो संस्था लक्षित हुनु, सिङ्गो समाजमाथिको हमला हो।
स्थानीय युवाहरू, महिलाहरू र सामाजिक अभियन्ताहरूले एक स्वरमा भन्छन्:
“पद्मोदय फाउन्डेसन जल्दैन, यसले फेरि उठ्नेछ – र अझ मजबुत भएर समाजसेवामा फर्कनेछ।”
यस घटनाले केवल पद्मोदय फाउन्डेसन मात्र होइन, समग्र मानवीय सेवामाथि प्रश्न खडा गरेको छ। दोषीहरू पहिचान गरी कडा कानुनी कारबाही गरिनुपर्छ भन्ने मागले अहिले गाउँ गुञ्जिरहेको छ।
