काठमाडौं । थाइल्याण्डमा प्रहरीले एक महिलालाई पक्राउ गरेको छ जसमाथि बौद्ध भिक्षुहरूले आफूसँग यौनसम्पर्क गरेको गोप्य रूपमा भिडियो खिचेको र त्यसपछि ती तस्बिर र भिडियोहरू प्रयोग गरेर पैसा असुलेको आरोप लागेको छ।
“मिस गल्फ” भनेर चिनिने एक महिलाले कम्तीमा नौ बौद्ध भिक्षुहरूसँग यौनसम्पर्क गरेको प्रहरीले मंगलबार एक पत्रकार सम्मेलनमा बताएको छ।
ती महिलाले विगत तीन वर्षमा लगभग १ अर्ब ६० करोड रुपैयाँ (३८ करोड ५० लाख भाट, लगभग ११.९ मिलियन अमेरिकी डलर) प्राप्त गरेको प्रहरीको विश्वास छ ।
प्रहरी प्रवक्ताले भने ‘जब अनुसन्धानकर्ताहरूले महिलाको घरमा खानतलासी गरे, उनीहरूले भिक्षुहरूलाई ब्ल्याकमेल गर्न प्रयोग गरिएका ८० हजार भन्दा बढी तस्बिर र भिडियोहरू फेला पारे।’
यो नयाँ काण्डले थाइल्याण्डमा धेरै पवित्र मानिने बौद्ध संस्थालाई फेरि एक पटक हल्लाएको छ । विगत केही वर्षहरूमा भिक्षुहरूलाई यौन अपराध र लागूपदार्थको तस्करीमा संलग्न भएको आरोप लगाइएको छ।
प्रहरीका अनुसार यो मुद्दा पहिलो पटक जुनको मध्यमा उनीहरूको ध्यानमा आएको थियो जब उनीहरूले बैंककका एक मठाधीशले एक महिलाले ब्ल्याकमेल गरेपछि अचानक भिक्षुको जीवन त्यागेको थाहा पाए ।
प्रहरीका अनुसार मिस गल्फले मे २०२४ मा भिक्षुसँग ‘सम्बन्ध स्थापित’ गरेकी थिइन्। पछि उनले आफू उनको बच्चाकी आमा भएको दाबी गरिन् र उनीबाट ७० लाख भाटभन्दा बढी मागेकी थिइन्।
यसपछि, प्रशासनले अनुसन्धान गर्दा अन्य भिक्षुहरूले पनि मिस गल्फलाई त्यसैगरी पैसा दिएको पत्ता लगायो । प्रहरीले यसलाई महिलाको “काम गर्ने तरिका” भनेर वर्णन गरेको छ।
प्रहरीले बैंक खाताबाट लगभग सबै पैसा निकालिएको र केही रकम अनलाइन जुवा खेल्न पनि प्रयोग गरिएको पत्ता लगाएको बताएको छ।
प्रहरीले यस महिनाको सुरुमा मिस गल्फको घरमा खानतलासी गर्दा उनको फोन जफत गरिएको र भिक्षुहरूलाई ब्ल्याकमेल गर्न उनले प्रयोग गरेका ८० हजार भन्दा बढी तस्बिर र भिडियोहरू बरामद भएको बताएको छ।
महिला विरुद्ध ब्ल्याकमेलिङ, मनी लान्ड्रिङ र चोरीका सामान राखेको लगायतका धेरै धाराहरू अन्तर्गत मुद्दा दर्ता गरिएको छ। प्रहरीले “गलत आचरण भएका भिक्षुहरू” को रिपोर्ट गर्न हेल्पलाइन पनि स्थापना गरेको छ।
घटनापछि थाई बौद्ध धर्मको प्रशासकीय निकाय संघ सर्वोच्च परिषद्ले भिक्षु नियमहरूको समीक्षा गर्न एक विशेष समिति गठन गर्ने घोषणा गर्यो।
सरकारले गुम्बाको आचारसंहिता उल्लङ्घन गर्ने भिक्षुहरू विरुद्ध कडा सजायको लागि पनि जोड दिइरहेको छ। यी सजायहरूमा जरिवाना र जेल सजाय समावेश छ।
यस हप्ता, थाइल्याण्डका राजा वजिरालोङकोर्नले जुनमा ८१ भिक्षुहरूलाई नियुक्त गर्न जारी गरिएको शाही आदेश खारेज गरेका थिए । राजाले हालैका दुर्व्यवहारका घटनाहरूलाई उद्धृत गर्दै यी घटनाले “बौद्ध अनुयायीहरूलाई गहिरो चोट पुर्याएको” बताएका थिए ।
थाइल्याण्डको ९०% भन्दा बढी जनसंख्याले आफूलाई बौद्ध मान्छन् र यहाँ भिक्षुहरूलाई धेरै सम्मान दिइन्छ। थाइल्याण्डका धेरै पुरुषहरू पनि राम्रो कर्मको लागि अस्थायी रूपमा भिक्षु बन्छन्।
तर विगतका वर्षहरूमा, बौद्ध संस्था धेरै घोटालाहरूले ग्रसित छ।
२०१७ मा, भिरापोल सुकफोल नामक एक भिक्षु आफ्नो भव्य जीवनशैलीको लागि प्रसिद्ध भएपछि अन्तर्राष्ट्रिय स्तरमा हेडलाइन बने। यसका साथै उनीमाथि यौन अपराध, ठगी र मनी लान्ड्रिङको आरोप लगाइएको थियो।
२०२२ मा, थाइल्याण्डको उत्तरी प्रान्त फेचाबुनको एक मन्दिरमा लागूऔषधको खोजीमा छापा मार्दा चार भिक्षुहरू पक्राउ परेका थिए।
थाई संघको अनुशासन र जवाफदेहिताका मुद्दाहरूको लागि वर्षौंदेखि आलोचना हुँदै आएको छ । तर धेरै विज्ञहरूका अनुसार शताब्दी पुरानो संस्थामा कुनै ठूलो परिवर्तन भएको छैन। विज्ञहरू भन्छन् ‘यसको मुख्य कारण यसको कडा पदानुक्रम प्रणाली हो।’
“यो थाई नोकरशाही जस्तै एक अधिनायकवादी प्रणाली हो, जहाँ वरिष्ठ भिक्षुहरू उच्च अधिकारी जस्तै हुन्छन् र कनिष्ठ भिक्षुहरू उनीहरूको अधीनस्थ हुन्छन्,” धार्मिक विद्वान सुराफोट थावीसाकले बीबीसी थाईलाई भने।
“जब उनीहरू केही गलत भइरहेको देख्छन्, उनीहरू बोल्ने आँट गर्दैनन् किनभने उनीहरूलाई मन्दिरबाट निकाल्न धेरै सजिलो छ।”
यद्यपि, केहीको विश्वास छ कि प्रहरी र संघ परिषद् दुवैमा भइरहेको अनुसन्धानले आवश्यक सुधारतर्फ महत्त्वपूर्ण कदम चाल्न सक्छ।
“सबैभन्दा महत्त्वपूर्ण कुरा भनेको संघको पवित्रताको बारेमा सार्वजनिक शंकाहरू हटाउन सत्यलाई उजागर गर्नु हो,” बैंककको थम्मासट विश्वविद्यालयकी समाजशास्त्री प्राकृति सातासुतले भनिन्।
