काठमाडौं । इरानको क्षेप्यास्त्र आक्रमणमा इजरायली अस्पताल क्षतिग्रस्त भएको छ र धेरै मानिसहरू घाइते भएका छन्। इजरायलले इरानले आफ्नो क्षेप्यास्त्र आक्रमणमा अस्पताललाई सिधै निशाना बनाएको आरोप लगाएको छ। तर, इरानले यसलाई अस्वीकार गरेको छ ।
“आज बिहान इरानका आतंकवादी तानाशाहहरूले सोरोका अस्पताल र बेरशेबाको नागरिक जनसंख्यामा मिसाइल प्रहार गरे,” इजरायली प्रधानमन्त्री बेन्जामिन नेतान्याहूले ट्विटरमा पोस्ट गरे ‘इरानका तानाशाहहरूले यसको पूरा मूल्य चुकाउनेछन् ।’
इजरायलको आपतकालीन सेवा म्यागेन डेभिड एडोम (एमडीए) का अनुसार इरानको हालैको आक्रमणपछि कम्तीमा ६५ जना घाइते भएका छन् र उनीहरूको उपचार भइरहेको छ। इजरायली सैन्य अधिकारीले इरानले आफ्नो पछिल्लो आक्रमणमा इजरायलमा दर्जनौं क्षेप्यास्त्र प्रहार गरेको बताएका छन्।
इजरायलले इरानले दक्षिणी इजरायलको बेरशेबामा रहेको सोरोका अस्पताल सहित नागरिक क्षेत्रहरूलाई निशाना बनाएको आरोप लगाएको छ।
इरानले भने इजरायलको आरोप अस्वीकार गरेको छ । इरानको सरकारी सञ्चारमाध्यमले आज बिहान इरानको क्षेप्यास्त्र आक्रमणको निशाना अस्पताल नभएको बताएको छ।
इरानले आफ्नो निशाना बेरशेबाको सोरोका अस्पताल नजिकै रहेको सैन्य अड्डा रहेको बताएको छ।
इस्लामिक रिपब्लिक न्यूज एजेन्सी (इरना) का अनुसार आक्रमण इजरायली सेनाको कमाण्ड मुख्यालय र गा-याम टेक्नोलोजी पार्कमा रहेको सेनाको गुप्तचर शिविरमा गरिएको थियो।
“अस्पताल केवल विस्फोटको लहरको सम्पर्कमा आएको थियो र कुनै गम्भीर क्षति भएन। सैन्य पूर्वाधार एक सटीक र प्रत्यक्ष लक्ष्य थियो,” रिपोर्टमा भनिएको छ।
