काठमाडौं । महिलामाथि यौन दुर्व्यवहार गरेको आरोप लागेका मधेस प्रदेशका पूर्व प्रमुख राजेश झा (अहिराज) विरूद्ध प्रहरीले अनुसन्धान थालेको छ ।
स्रोतका अनुसार जिल्ला प्रहरी परिसर काठमाडौं भद्रकालीस्थित महिला सेलले उनीविरूद्ध यौन दुर्व्यवहार कसुरमा अनुसन्धान गरिरहेको हो।
परिसरका प्रवक्ता एवं एसपी अपिलराज बोहराले दुर्व्यवहारको विषय आएकाले वास्तविकतामाथि अनुसन्धान भइरहेको बताए पनि थप केही उल्लेख गर्न चाहेनन् ।
प्रहरीले घटनाको वास्तविकता के हो ? त्यतिकै आरोप लगाइएको होकि घटना भएकै हो भन्नेबारेमा सबै पाटोमा अनुसन्धान गरिरहेका काठमाडौं परिसरले जनाएको छ ।
अहिराजमाथि महिलालाई दुर्व्यवहार भनिए पनि कस्तो दुर्व्यवहार हो र कहिलेको घटना हो भन्नेबारे प्रहरीले केही खुलाएको छैन ।
यस विषयमा अहिराजलाई सम्पर्क गर्न खोज्दा सम्पर्क हुन सकेन । उनको मोबाइल स्वीच्ड अफ छ ।
पक्राउ पुर्जी जारी
अहिराजबिरुद्ध पक्राउ पुर्जी जारी भएको छ । झा २०७७ फागुन ७ मा मधेशको प्रदेश प्रमुख नियुक्त भएका थिए ।
फौजदारी कसुरमा काठमाडौँ जिल्ला अदालतले उनीविरुद्ध पक्राउ अनुमति जारी गरेको हो ।
चैत २५ मा उनीविरुद्ध अदालतबाट पुर्जी जारी भएको स्रोतको दावी छ ।
