आमाको हत्या आरोपमा एक पक्राउ

सिरहा : घरायसी झगडाको कारण आफ्नै आमालाई कुटपिट गरी हत्या गरेको आरोपमा सिरहा प्रहरीले एक व्यक्तिलाई पक्राउ गरेको छ ।
जिल्लाको कर्जन्हा नगरपालिका ३ खैराटोल निवासी ४७ वर्षिय रामअवतार साह सोनारलाई ८५ वर्षीया वृद्धा आमा सुदामा देवीलाई कुटपिट गरी हत्या गरेको आरोपमा प्रहरीले पक्राउ गरेको हो ।
घरयासी झगडाको रामअवतारले आमाको घाँटी थिचेर कुटपिट गरेका थिए । कुटपिटबाट घाइते भएकी सुदामालाई उपचारका लागि सिरहा अस्पतालमा ल्याइयो ।
त्यहाँ उपचार सम्भव हुन नसकेपछि थप उपचारका लागि जनकपुरधाम स्थित श्रीराम जानकी मेडिकल कलेज सिटी अस्पतालमा ल्याइयो तर यहाँ पनि अवस्थामा सुधार नआएपछि रेफर गरिदियो ।
आर्थिक अवस्थाले बाहिर नलगी पुनः सिरहा अस्पतालमै लगियो र त्यही उपचारको क्रममा मृत्यु भएको जिल्ला प्रहरी कार्यालय सिरहाका प्रहरी नायब उपरिक्षक शालीग्राम शर्माले जानकारी दिएका छन ।
उपचारमा संलग्न चिकित्सकहरुका अनुसार घाइतेको घाँटीमा गम्भीर चोट लागेकोले हड्डी टुटेको थियो । पक्राउ परेका साहलाई हिरासतमा राखेर थप अनुसन्धान भइरहेको उनले बताएका छन ।
स्थानीयका अनुसार रामअवतारले बोक्सी आरोपमा आफ्नै आमा सुदामालाई बोक्सी आरोपमा निर्घात रुपमा कुटपिट गरेका थिए । कुटपिट मात्रै होइन मूलमुत्र खुवाउने प्रयास समेत गरिएको थियो । तर स्थानीयको अवरोधपछि उनको त्यो प्रयास सफल हुन सकेन ।
बोक्सी आरोपमै कुटपिट गरिएको भन्ने बारे प्रहरी नायब उपरिक्षक शर्माले भने स्थानीयले बोक्सी आरोपमै कुटपिट गरिएको भन्दै आएका छन तर आमा छोराबीच घरायसी विवाद हुँदै आएको थियो । वास्तविकता के हो अनुसन्धान पछि नै बाहिर आउने छ ।
यसअघि पनि आमा छोराबीच विवाद हुँदै आएको थियो । रामअवतारले पटक पटक कुटपिट गर्ने गरेको थियो भनाई स्थानीयको छ ।