काठमाडौं। राजा फर्काउने आन्दोलन गरिरहेका दुर्गा प्रसाईं फरार भैरहँदा उनका सहयोगीहरु धमाधम पक्राउ परेका छन्। शुक्रबार साँझबाट फरार प्रसाइलाई प्रहरीले अहिलेसम्म पक्राउ गर्न सकेको छैन।
तीन दिन यता प्रहरीको केन्द्रीय अनुसन्धान व्यूरो, विशेष व्यूरो, उपत्यका अपराध अनुसन्धान कार्यालय, उपत्यका प्रहरी कार्यालयको टास्क फोर्सले खोजी गरिरहेको छ।
साथै सबै नाकामा प्रहरी परिचालन गरेको छ। तर पनि उनी पक्राउ पर्न सकेका छैनन्। केही प्रहरी अधिकारीले उनी भारत गएको हो कि भन्ने शंका गरिरहेका छन्। प्रहरीको एउटा यूनिटले भारतीय प्रहरीसँग समन्वय गर्दै आएको छ। तर पनि उनी पक्राउ पर्न सकेका छैनन्।
उनका सहयोगी भने भटाभट पक्राउ परिरहेका छन्। अहिले साँझ मात्रै संयुक्त जनआन्दोलन घोषणा सभा परिचालन समितिका संयोजक पक्राउ परेका छन्। झापा घर भएका देवी संग्रौलालाई प्रहरीको विशेष टोलीले ललितपुरको भैँसेपाटीबाट पक्राउ गरेको हो। संग्रौलासँगै विष्णुजंग बस्नेत पनि पक्राउ परेका छन्।
तीनकुनेमा भएको हिंसात्मक प्रदर्शनमा संलग्न रहेका संग्रौलालाई पनि प्रहरीले पक्राउ गरेको हो। यसअघि प्रसाईंको सुरक्षा दस्ताका ४ जना पनि पक्राउ परिसकेका छन्। तर प्रसाईंको अझै अत्तोपत्तो छैन।
उनले आइतबार दिउसो एक भिडियो सार्वजनिक गर्दै काठमाडौंको एक मन्दिरमा छु भनेर भनेका थिए। तर उनी रातारात मोटरसाइकलमा भारत पुगिसकेको खबर सुरक्षा निकायमा छ।
मोटरसाइकलमा चढेर रातारात हेटौंडा हुँदै भारत पुगेको र नेपालकै मन्दिरमा छु भनेर बनाएको भिडियो पनि भारतकै एक मन्दिर भएको ती प्रहरी अधिकारीको दावी भएपनि प्रहरीको उच्च तहले विश्वास गरेको छैन। प्रहरीले अहिले पनि चार वटा टोली खटाइरहेको छ।
आइतबार साँझ प्रहरी महानिरीक्षक (आईजीपी) दीपक थापाले प्रसाईंलाई कुनै पनि हालतमा पक्राउ गर्न मातहतका सुरक्षा अधिकारीलाई ‘कडा’ निर्देशन दिएका थिए। मातहतका सबै निकाय उत्तिकै अलर्टमा बसेको छ।
उनी भागे पनि प्रहरीले प्रदर्शनमा सहभागी राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्र र पार्टी महामन्त्री एवं सांसद धवलशमशेर जबरालाई सोही राति पक्राउ गरेको थियो।
मिश्र र जबरासहित ११ जनाविरुद्ध राज्यविरुद्धको कसुर, संगठित र उपद्रव कसुरमा मुद्दा चलाइएको छ। आइतबार काठमाडौं जिल्ला अदालतले उनीहरूविरुद्ध अनुसन्धान गर्न प्रहरीलाई पाँच दिनको अनुमति दिएको छ।
उनीहरूसँगै पक्राउ परेका अरू ४१ जनालाई पनि थुनामा राखेर अनुसन्धान गर्न अदालतले तीन दिनको अनुमति दिएको छ। प्रसाईंको खोजीमा रहेका एक प्रहरीका अनुसार उनको अन्तिम लोकेशन इमाडोलमा ट्रयाक भएको थियो।
इमाडोलबाट एउटा ट्याक्सी लिएर हिँडेका उनी कता गए भन्ने बारेमा कतै पनि ट्रयाक हुन सकेको छैन। इमाडोलमा पुस्कर खतिवडाको घरमा स्याउ र केरा खाएर प्रसाई फरार भएका थिए।
