काठमाडौं । पाकिस्तानका सुरक्षा स्रोतहरूले बलुचिस्तान प्रान्तमा भएको रेल अपहरणपछि यात्रुहरूलाई उद्धार गर्ने आफ्नो अभियान अझै जारी रहेको र बन्धकहरूको बीचमा आत्मघाती बमवर्षकहरूको उपस्थितिका कारण सावधानी अपनाइएको बताएका छन्।
पाकिस्तानका सैन्य स्रोतहरूले बीबीसी उर्दूसँग दाबी गरेअनुसार उनीहरूको कारबाहीमा अहिलेसम्म १५५ यात्रुहरूको उद्धार गरिएको छ र २७ अतिवादीहरू मारिएका छन्।
अर्कोतर्फ, रेलमा भएको यस आक्रमणको जिम्मेवारी लिएको बीएलएले पनि सुरक्षाकर्मी मारिएको दाबी गरेको छ।
मृत्युको संख्याको बारेमा दुवै पक्षबाट कुनै आधिकारिक तथ्याङ्क जारी गरिएको छैन, तर रेलवे अधिकारीहरूका अनुसार क्वेटा रेलवे स्टेशनबाट राहत रेलमार्फत २० भन्दा बढी शवपेटीहरू बोलान पठाइँदैछ।
एक अधिकारीले नाम न छाप्ने सर्तमा बीबीसी उर्दूलाई बताएअनुसार क्वेटाबाट बोलानमा राहत रेल पठाइँदैछ, जसले विभिन्न सामानहरू बोकेर जानेछ र क्वेटा प्रशासनले २०-२५ वटा खाली कफिनहरू पनि प्लेटफर्ममा ल्याएको छ, जुन राहत रेलद्वारा पठाइनेछ।
