कृषि विकास बैंक लहान शाखाले प्रक्रिया मिचेर जग्गा लिलाम गरेको भन्दै ऋणी किसान रामचन्द्र यादव सडकमै सुतेर आन्दोलन थालेका छन् । उनलाई साथ दिन अन्य स्थानीय किसानहरु पनि आन्दोलनमा उत्रेका छन् । उनीहरुले लहानस्थित पूर्वपश्चिम राजमार्गमा बिहीबार बिहान ११ बजेदेखि दिउँसो २ बजेसम्म चक्काजाम गरेका थिए ।
त्यस क्रममा प्रदर्शनकारी र प्रहरीबीच झडप भएको थियो । स्थिति तनावग्रस्त बनेको थियो । झडपमा दर्जनभन्दा बढी प्रदर्शनकारी र १० भन्दा बढी प्रहरी घाइते भएका छन्।
सिराहाका प्रहरी प्रवक्ता डीएसपी वीरेन्द्रकुमार पासवानका अनुसार स्थिति नियन्त्रणमा लिन प्रहरीले १० राउन्ड अश्रुग्यास प्रहार र ४ राउन्ड हवाई फायर गरेको थियो। हाल परिस्थिति सामान्य भएको प्रहरीले जानकारी दिएको छ। त्यस क्रममा प्रहरीले सडकमा सुतेका किसान रामचन्द्र यादवलाई प्रहरीले घसारेका थिए ।
यादवको जग्गा लिलाम प्रकरणबाट सुरु भएको हो । यादवले लहान नगरपालिका वडा नं. २ मा पर्ने ७ धुर जग्गा धितो राखेर २०७७ साल फागुन १५ गते कृषि विकास बैंकबाट ३० लाख रुपैयाँ ऋण लिएका थिए। रामचन्द्रका अनुसार, उनले यसअघि नै किस्ताबन्दीमा १९ लाख ९२ हजार ७७३ रुपैयाँ तिर्दै आएका थिए। तर, बाँकी रकम चुक्ता गर्न नसकेको भन्दै बैंकले जग्गा लिलाम प्रक्रिया अघि बढाएको थियो।
स्थानीयहरूका अनुसार बैंकले कानूनी प्रक्रिया नपु¥याई बलपूर्वक लिलाम गर्न खोजेको भन्दै विरोध प्रदर्शन गरिएको हो।
