गरिबी निवारण र आर्थिक सशक्तिकरणमा समग्र जनउत्थान केन्द्रको पहल

सिरहा, धनगढीमाई – समग्र जन उत्थान केन्द्र लहानले धनगढीमाई नगरपालिका क्षेत्रका गरिब, दलित, महिला तथा हिंसा प्रभावित व्यक्तिहरूलाई आर्थिक सशक्तिकरणका लागि बीउ पुजी वितरण गरेको छ। न्यायमा पहुँच अभिवृद्धि (A2J) परियोजना अन्तर्गत समाजमा सीमान्तकृत समूहहरूलाई न्याय र समृद्धिको यात्रामा सहकार्य गर्ने उद्देश्यले रु ५ हजारदेखि ७ हजारसम्मको बीउ पुजी हस्तान्तरण गरिएको हो।
यसपटक धनगढीमाई नगरपालिकाका ७ जना लाभार्थीहरूले यो सहयोग पाएका छन्। परियोजनामा महिला, दलित, गरिब, अपांगता भएका व्यक्ति (PWDs), LGBTQI+ समुदाय, मुसहर, डोम, चमार, मुस्लिम, थारू लगायतका समुदायलाई प्राथमिकता दिइएको छ।
सामाजिक परिचालक प्रतिमा चौधरी र रुपा मण्डलको सहजीकरणमा सञ्चालन भइरहेको यो कार्यक्रम सिरहाको धनगढीमाई नगरपालिका, लक्ष्मीपुर पतारी गाउँपालिका, सप्तरीको खडक नगरपालिका र बोदेबरसाईन नगरपालिकामा कार्यान्वित छ। परियोजनाले ३ हजारदेखि १३ हजारसम्मको आर्थिक सहयोगमार्फत लाभार्थीहरूको सामाजिक र आर्थिक स्तर उठाउने उद्देश्य राखेको छ।
सीमान्तकृत समुदायलाई प्राथमिकता
परम्परागत रूपमा बहिष्कृत समुदाय, हिंसा प्रभावित महिला, दलित, अल्पसंख्यक, अपांगता भएका व्यक्ति र LGBTQI+ व्यक्तिहरूलाई परियोजनाले कानूनी सहायता, अधिकारको जानकारी, र सरकारी सेवामा पहुँच उपलब्ध गराउँदैछ।
परियोजनाले सरकारी निकाय, नेपाल प्रहरी, न्यायिक समिति, पत्रकार र नागरिक समाजका संगठनहरूसँग सहकार्य गर्दै जवाफदेहीता र क्षमता विकासमा केन्द्रित कार्यक्रमहरू सञ्चालन गरिरहेको छ।
समग्र जन उत्थान केन्द्रले समाजमा आर्थिक र सामाजिक बहिष्करण झेलिरहेका समुदायको जीवनस्तर सुधार्ने आफ्नो प्रतिबद्धता पुनःप्रस्तुत गर्दै स्थानीय सरकारहरूलाई पनि परियोजनामा सहकार्य गर्न आह्वान गरेको छ।