काठमाडौं । पाकिस्तानको खैबर पख्तुनख्वामा आतंकवादी हमलाको घटना सार्वजनिक भएको छ । यो आतंकवादी हमलामा ५० जनाको मृत्यु भएको बताइएको छ । यो हमला खैबर पख्तुनख्वाको डाउन कुर्रम क्षेत्रमा यात्रु भ्यानमा भएको हो । आक्रमणमा एक प्रहरी अधिकारी र महिलासहित दर्जनौं व्यक्ति घाइते भएका छन् ।
एएफपी रिपोर्टका अनुसार यस आक्रमणमा ५० जनाको मृत्यु भएको छ। यात्रु भ्यान तल्लो कुर्रमको ओचुत काली र मन्डुरी नजिकैबाट गुज्रने बित्तिकै त्यहाँ पहिल्यै आक्रमणको तयारी गरी बसेका आतंककारीहरूले भ्यानमा अन्धाधुन्ध गोली चलाउन थाले। यात्रुवाहक भ्यान पाराचिनारबाट पेशावरतर्फ गइरहेको थियो ।
पाकिस्तानको समाचार एजेन्सी डनका अनुसार तहसिल मुख्यालय अस्पताल अलिजाइका अधिकारी डाक्टर घ्योर हुसैनले आक्रमणको पुष्टि गरेका छन्। मृत्यु भएकामध्ये १४ जनाको परिचयपत्र नभएकाले अहिलेसम्म सनाखत हुन नसकेको अधिकारीहरुले जनाएका छन्, उनीहरुका आफन्तसँग सम्पर्क गर्ने प्रयास जारी छ ।
यसैबीच पाकिस्तानी राष्ट्रपति आसिफ अली जरदारीले यस घटनाको कडा शब्दमा निन्दा गर्दै मृतकका शोकसन्तप्त परिवारप्रति समवेदना व्यक्त गरेका छन्। पीपीपीले एक्समा एक पोस्टमा निर्दोष यात्रुहरूमाथि आक्रमण गर्नु कायरतापूर्ण र अमानवीय कार्य भनेको छ । यस घटनाका दोषीलाई कारबाही गर्नुपर्ने पार्टीले जनाएको छ । साथै घाइतेलाई समयमै स्वास्थ्य सेवा उपलब्ध गराउन माग गरिएको छ ।
रोयटर्सका अनुसार खैबर पख्तुनख्वा प्रान्तका मुख्य सचिव नदीम अस्लम चौधरीले कुर्रममा भएको आक्रमणमा मारिनेमा एक महिला र एक बालक पनि रहेको बताएका छन् । उनले यो ठूलो दु:खद घटना भएको र मृतकको संख्या बढ्न सक्ने बताए ।
यस घटनाको अहिलेसम्म कुनै समूहले जिम्मेवारी लिएको छैन । पाराचिनारका स्थानीय बासिन्दा जियारत हुसेनका अनुसार दुईवटा यात्रुवाहक सवारी साधनमा गोली चलाइएको थियो । एउटा यात्रु बोकेर पेशावरबाट पाराचिनार र अर्को पाराचिनारबाट पेशावरतर्फ जाँदै गर्दा बन्दुकधारीले गोली चलाएका थिए ।
