गोलबजारमा पनि डा.केसीको समर्थनमा युवाहरुद्धारा भोक अनशन

48

संजय यादव, २४ आश्विन,
गोलबजार, सिरहा
सिरहामा पनि अनशनरत डा. गोबिन्द केसीको समर्थनमा भोक अनशनमा बसेका छन् । चिकित्सा क्षेत्रमा सुधारको माग गर्दै अनशनरत डा.केसीको समर्थनमा गोलबजारमा चिन्तनशिल युवाहरु एकदिने अनशनमा बसेका छन् । डा. केसीको अनशनप्रति एक्यवद्धता जनाउँदै उनको जीवन रक्षाको लागि सरकारमाथि दवाव सृजना गराउने उद्धेश्यले उनीहरू एकदिने अनशनमा बसेका हुन् । जिल्लाको बिभिन्न ठाँउको सचेत युवाहरुकोे समूहले गोलबजारस्थित गोलपार्क अगाडी बिभिन्न माँगहरु लेखिएको प्लेकार्ड सहित भोकभोकै अनशनमा छन् । ’मधेश विथ डा. केसी’को नारासहित विहान ६ बजेदेखि शुरु गरिएकोे अनशन बेलुकी ६ बजेसम्म चलेको छ । डा. केसीका माग जायज भएपनि सरकार गैरजिम्मेवार र उदासीन देखिएको भन्दै दवाव सृजना होस् र मधेशबाट एक किसिमको सकारात्मक संदेश जाओस् भन्ने उद्देश्यले अनशन बसेको अनशनरत समूहका युवा नागेश्वर रायको भनाइ छ ।

’डा. केसीका माग जनहितका माग हुन, तसर्थ सरकारले यी मागहरु सम्बोधन गर्न ढिलाइ गर्न हुँदैन ।’ मुलुकमा मधेशलाई हेर्ने दृष्टिकोण फरक भएकाले पनि यस्ता कार्यक्रम गरेर सकारात्मक संदेश दिन चाहेको भोक अनशनमा बसेका अर्का युवा संतोष यादवको भनाई रहेको छ । सरकारले बेवास्ता गरे जनस्तरबाट थेग्न नसक्ने अवस्था सृजना हुनसक्ने यादवले उल्लेख गरे । १९औं पटक अनशनरत डा. केसीको जीवन रक्षा हेतु र माग सम्बोधनका लागि सरकारलाई दवाव बनाउन मधेशका जिल्लासहित अन्य जिल्लाहरुमा समेत यस्ता रचनात्मक कार्यक्रम गर्न अनशनरत युवाहरुकोे आग्रह छ । सरकारले डा. केसीसँग वार्ताका लागि अस्ति भर्खरै वार्ता टोली गठन गरेपनि वार्ताका लागि कुनै ठोस कदम चालिएको छैन । सरकारको उदासीनताले विगत २७ दिनदेखि निरन्तर अनशनमै रहेका डा. केसीको स्वास्थ्य अवस्था पछिल्लो समय नाजुक बन्दै गएको छ । नेपाल चिकित्सक संघले आइतबार देशभरका स्वास्थ्य संस्था तथा अस्पतालहरुमा आकस्मिक र कोभिड–१९ का सेवा बाहेक सम्पूर्ण स्वास्थ्य सेवा ठप्प पर्ने घोषणा गरेको छ भने आइतबारसम्म पनि सत्याग्रहको अन्त्य नभएको अवस्थामा थप कडा आन्दोलनका कार्यक्रममा जान बाध्य हुने चेतावनी दिएको छ । यसअघि संघले केसीसँगको वार्ता सकारात्मक रुपमा अगाडि बढेको भन्दै आश्विन २३ गते शुक्रबार तय भएको स्वास्थ्य सेवा ठप्प पार्ने कार्यक्रम स्थगित गरेको थियो । तर, केसीको माग हालसम्म पनि पूरा हुन नसकेपछि संघ फेरि आन्दोलित बनेको हो ।