काठमाडौं । इजरायली सेनाले जेनिनमा हमास प्रमुख विसाम खाजिमसहित तीन प्यालेस्टाइनीको हत्या गरेको दाबी गरेको छ । इजरायली सेनाले कब्जा गरेको वेस्ट बैंकमा ठूलो सैन्य कारबाही गरिरहेको छ।
इजरायली सेनाको एक विज्ञप्तिमा भनिएको छ, “इजरायली सुरक्षा बलहरूले भिसाम खाजिमलाई भिडन्तमा मारेका छन्। त्यतिबेला उनी कारमा थिए । यसपछि भाग्न खोजिरहेका थप दुई आतंककारी हवाई हमलामा मारिएका थिए ।”
प्यालेस्टाइनको स्वास्थ्य मन्त्रालयले जेनिनको दक्षिणपूर्वमा रहेको जबादेह सहरमा गएराति तीन जनाको मृत्यु भएको जनाएको छ ।
प्यालेस्टिनी मिडियाले रिपोर्ट गरेअनुसार इजरायली सेनाले शहरमा पूर्वाधार र शरणार्थीहरू बस्ने भवनहरूमा ठूलो क्षति पुर्याएपछि तुलकर्मबाट पछि हटेको छ।
इजरायलले वेस्ट बैंकका चार सहर तुल्कार्म, जेनिन, टुबास र नाब्लसमा सैन्य कारबाही गरेको छ । उसले “आतंकवाद विरोधी अभियान” चलाइरहेको दाबी गरेको छ ।
विगत २० वर्षमा वेस्ट बैंकमा इजरायलको यो सबैभन्दा ठूलो अपरेशन भएको मानिन्छ।
