काठमाडौं । टर्कीको राष्ट्रपति कार्यालयका अनुसार अंकारामा रुस र अमेरिकालगायत पश्चिमी देशबीच कैदी आदानप्रदान भएको छ ।
वाल स्ट्रिट जर्नलका रिपोर्टर इभान गेर्शकोविच र अमेरिकी मरीन दिग्गज पल ह्वेलनलाई रिहा गरिएको थियो।
अमेरिका, नर्वे, स्लोभेनिया, पोल्याण्ड र जर्मनीका जेलमा रहेका आठ रुसी नागरिकलाई रुस फिर्ता पठाइने अपेक्षा गरिएको छ ।
टर्कीले रुस र पश्चिमी देशहरूबीच कैदीहरूको यो आदानप्रदानको आयोजना गरेको थियो।
यस आदानप्रदानमा २६ कैदीहरू संलग्न थिए। यद्यपि, रुस, अमेरिका वा अन्य कुनै पनि युरोपेली देशहरूले सार्वजनिक रूपमा यो विनिमय पुष्टि गरेका छैनन्।
टर्कीका अनुसार दुई नाबालिगसहित १० जनालाई रुस, १३ जनालाई जर्मनी र तीन जनालाई अमेरिका पठाइएको छ ।
टर्कीको राष्ट्रपति कार्यालयले सबै बन्दीहरूलाई विमानबाट निकालेर अधिकारीहरूको निगरानीमा सुरक्षित स्थानमा लगिएको जनाएको छ। त्यसपछि ती सबैलाई आफ्नो देश जानका लागि विमानमा राखियो।
अमेरिका र रुसबीच कैदीको सबैभन्दा ठूलो आदानप्रदान सन् २०१० मा भएको थियो, जब रुसका लागि जासुसी गरेको आरोपमा अमेरिकामा १० जना पक्राउ परेका थिए।
यसपछि यी १० रुसी कैदीलाई भियना विमानस्थलमा अन्य चार बन्दीसँग साटासाट गरिएको थियो ।
