एजेन्सी : संयुक्त राज्य अमेरिकाले कोरोना महामारीका कारण अर्थतन्त्र धराशायी भएका मेकोङ राष्ट्रहरुलाई आर्थिक सहयोग गर्ने प्रतिबद्धता व्यक्त गरेको छ ।
अमेरिकाले दक्षिणपूर्वी एसियाको मेकोङ क्षेत्रका पाँच राष्ट्रहरुलाई १५० मिलियन अमेरिकी डलर सहयोग गर्ने प्रतिबद्धता व्यक्त गरेको हो ।
जसमा थाइल्यान्ड र भियतनामसमेत रहेका छन् । यस विषयमा अमेरिकी विदेश मन्त्रालयले सोमबार आर्थिक सहयोग गर्ने प्रतिबद्धता व्यक्त गरेको हो ।
शुक्रबार अमेरिका-मेकोङ राज्यहरुको पहिलो मन्त्रीस्तरी बैठकपछि अमेरिकाले सहयोगको प्रतिबद्धता व्यक्त गरेको हो ।
कोरोना महामारीका कारण तहसनहस भएको अर्थतन्त्र सधारका लागि अमेरिकाले उक्त रकम उपलब्ध गराउन लागेको विदेश मन्त्रालयले जनाएको छ । त्यसैगरी अमेरिकाले यी मुलुकहरुको जलविद्युत तथा अन्य परियोजनाहरुमा पनि सहयोग गर्ने बताएको छ ।
अमेरिकी विदेशमन्त्री माइक पोम्पेओले अमेरिकाको इन्डो-प्यासिफिक रणनीतिका लागि मेकोङ राष्ट्रहरुको सम्बन्ध अभिन्न अंग भएको बताएका छन् ।
अमेरिकाले चीनलाई काउन्टर दिनका लागि पनि यी राष्ट्रहरुकव सहयोग अति आवश्यक भएका कारण अमेरिकाले यी मुलुकहरुलाई आर्थिक सहयोग गरिरहेको बुझिएको छ ।
त्यसैगरी चीनले पनि यी राष्ट्रहरुको पूर्वाधार विकासमा सहयोग गर्ने प्रतिबद्धता व्यक्त गरेको छ । त्यसैगरी कोरोना भाइरविरुद्धको खोप उपलब्ध गराउनेसमेत चीनले प्रतिबद्धता व्यक्त गरेको छ ।
