राजविराज । सप्तरीका पालिका प्रमुखहरुले बदनियतपूर्ण तरिकाले अख्तियार दुरुपयोग अनुसन्धान आयोगमा उजुरीहरु पठाउने गरिएको बताए । उनीहरुले अत्यधिक उजुरी पठाउँदा सोंच अनुरुपको काम समेत गर्न नसकिएको बताए ।
अख्तियार दुरुपयोग अनुसन्धान आयोगले सोमबार राजविराजमा आयोजना गरेको कार्यक्रममा बोल्दै पालिका प्रमुखहरुले उजुरीको बारेमा जवाफ लेख्दालेख्दै कर्मचारी हैरान बनिरहेको समेत बताए ।
कंचनरुप नगरपालिकाका प्रमुख ललन प्रसाद गुप्ताले कुनै योजनाको काम शुरु नहुँदै उजुरी पठाइदिने गरिएको बताए । ‘केहि काम चालू नै रहेको अवस्थामा र केहि काम शुरु नहुँदै उजुरी पठाउने गरिएको छ’ उनले भने, ‘यसले द्रूत गतिमा काम गर्ने इच्छा हुँदाहुँदै गर्न अप्ठ्यारो भइरहेको छ ।’
सप्तकोशी नगरपालिकाका प्रमुख कृष्ण प्रसाद ढकालले बिना तथ्य र प्रमाणकै आधारमा उजुरी परिरहेको बताए । आयोगका आयुक्त डा. करी पौडेल सहभागी रहेको कार्यक्रममा उनले बदनियतपूर्ण उजुरी दिनेलाई कार्वाही हुन्छ कि हुँदैन् ? भनेर प्रश्न गरे ।
सुरुङा नगरपालिकाका प्रमुख गीता चौधरीले हरेक पालिकामा अख्तियारको शाखा खोल्नुपर्ने बताइन् । ‘यो काम गरौं कि नगरौं, भुक्तानी गरौं कि नगरौं अख्तियारसँग सोधेरै गर्नुपर्ने अवस्था आएको छ’ उनले भनिन् ।
‘मुद्दा दर्ता गरेपछि कुनै व्यक्ति आत्महत्या गरेपछि निर्दाेष ठहरिए उजुरी हाल्ने व्यक्तिलाई आत्महत्या दुरुत्साहन मुद्दा हाल्नुपर्छ’ उनले भनिन् ।
राजविराज नगरपालिकाका कार्यबाहक प्रमुख इसरत परबिनले उजुरी हाल्ने क्राइट एरिया तोकिनुपर्ने बताइन् । जथाभावी तरिकाले बिना कारण पनि उजुरी दिँदा नगरपालिका नै अस्तव्यस्त बनेको उल्लेख गरेको भन्दै उनले मनमा लाग्नेवित्तिकै उजुरी हालिदिने प्रबृत्ति बढेको बताइन् ।
तिलाठी कोइलाडी गाउँपालिकाका अध्यक्ष अरुण कुमार मण्डलले नियतबश दिने उजुरीको छिटो फछ्र्याैट गर्नुपर्ने बताए । ‘नभै काम प्रभावित हुन्छ’ उनले भने ।
अख्तियारमा उजुरी पर्ने त्रासका कारण कर्मचारीले राम्रो योजनामा पनि हस्ताक्षर नगर्ने गरेको बताउँदै उनले यसतर्फ अख्तियारले पनि ध्यान दिनुपर्ने बताए ।
रुपनी गाउँपालिकाका अध्यक्ष दिनेश कुमार यादवले मनमानी तरिकाले उजुरी पठाउँदा कर्मचारीलाई जवाफ लेख्दै व्यस्त रहनुपरेको बताए ।
डाक्नेश्वरी नगरपालिकाका प्रमुख रामलखन मलाहले योजना, कार्यक्रम माग्न आउनेहरुले नपाउँदा पनि बिना तथ्यको अख्तियारमा उजुरी दिइरहेको बताए । बदनियतपूर्ण तथा राजनीतिक पूर्वाग्राही हिसाबले उजुरी पठाउने गरिएको उनले बताए ।
बलान बिहुल गाउँपालिकाका अध्यक्ष खेमचन्द्र यादवले राजनीतिक प्रतिस्पर्धीहरु बदनियतपूर्ण तरिकाले बदनाम गराउन उजुरी हाल्ने गरेको बताए । उनले चरित्र हत्या गर्नेगरी उजुरी हाल्नेलाई कार्वाही गर्नुपर्ने बताए ।
पालिका प्रमुखहरुले कर्मचारीको अभावका कारण सेवा प्रवाहमा समस्या भइरहेको समेत बताए ।
तिरहुत गाउँपलिकाका अध्यक्ष विजय यादवले रातारात प्रमुख प्रशासकीय अधिकृत आफ्नो सरुवा गराएर जाँदा बरबुझारथ समेत नगरेको बताए । ‘आफैंले गरेको कामको कार्यदेश र भुक्तानी नगर्दा म साह्रै पीडित भएको छु’ उनले यसतर्फ सरोकारबालालाई भन्दा पनि कसैले ध्यान दिएको छैन् ।’
जिल्ला समन्वय समितिका प्रमुख शिबनारायण साहले कर्मचारी अभावको समस्यातर्फ अख्तियारले पनि सम्बन्धित निकायको ध्यानाकर्षण गराउनुपर्ने बताए ।
प्रमुख जिल्ला अधिकारी किरण थापाले पनि जिल्लामा पालिकासहित अन्य कार्यालयमा समेत कर्मचारीको अभाव रहेकाले सेवा प्रवाह चुस्त दुरुस्त हुन नसकिरहेको बताए ।
