काठमाडौं – एमाले वरिष्ठ उपाध्यक्ष ईश्वर पोखरेलले आफ्नो छोरा स्वराज पोखरेलको सुन तस्कर दावा छिरिङसँग व्यापारिक साझेदार भएको भन्दै आएको समाचारप्रति आपत्ति जनाएका छन् ।
उनले नियोजित रूपमा आफ्नो परिवारलाई जोडेर लेखेको समाचार झुटो भन्दै कानुनी कारबाहीमा जाने चेतावनी दिएका छन् । शुक्रबार नेपाल खबर अनलाइनमा सुन तस्कर दावासँग ईश्वर पोखरेलका छोरा स्वराज पोखरेल र रामबहादुर थापा बादलका छोरा प्रतीक थापा व्यापारिक साझेदार रहेको समाचार आएको थियो ।
यही समाचारले एमाले नेता पोखरेल भड्केका हुन् । उनले सो समाचारलाई सरकारी कारखानामा तयार भएको भन्दै आपत्ति पनि जनाएका छन् ।
‘माओवादी नेताको लगानी रहेको नेपाल खबर नामक अनलाइनले पत्रकारिता पेशाको सामान्य मर्यादा पनि नराखी नियोजित रूपमा मेरो परिवारलाई जोडेर लेखेको शतप्रतिशत झुटो समाचारको म घोर निन्दा, भर्त्सना र खण्डन गर्न चाहन्छु । माओवादीका उपमहासचिवको लगानी रहेको र कतिपय लगानीकर्ताको लगानी समेत ठगी गरेको भनेर यसअघि नै विवादित त्यस अनलाइनले सरकारी कारखानामा तयार पारिएको समाचार प्रकाशित गरेर मालिकको सेवा गरेको प्रष्टै छ । यो हाम्रो पार्टीलाई बदनाम गरी सुन तस्करी प्रकरणलाई अन्तै मोड्ने प्रपञ्च हो । म चुनौतीका साथ भन्न चाहन्छु ( मेरो परिवारको यस्ता कुनै कुरामा संलग्नता छैन । यस्ता कुराबाट भ्रमित नहुन म सबै शुभेच्छुक र पार्टी पंक्तिलाई आह्वान गर्दछु । यस सम्बन्धमा आज कानुनी कारबाही पनि अगाडि बढाउने सबैमा जानकारी गराउन चाहन्छु,’ पोखरेलले सामाजिक सञ्जालमा लेखेका छन् ।
एक क्विन्टल सुन (जुन गाल्दा करिब ६१ किलो भएको छ) का मुख्य तस्कर तिब्बती मूलका बेल्जियन नागरिक दावा छिरिङ भएको प्रहरीले दाबी गरेको छ ।
दावाको माओवादी नेताहरू वर्षमान पुन, ओनसरी घर्ती, नन्दबहादुर पुनलगायतसँग निकै राम्रो सम्बन्ध रहेको पाइएको छ । उनले ठमेलमा होटल चलाउँदै आएका छन् । मोडियाडबलि
