काठमाडौं । राष्ट्रपति को बन्ने भनेर राजनीतिक वृत्तमा चर्चा गहिरिएको छ । वर्तमान राष्ट्रपति विद्यादेवी भण्डारीको कार्यकाल फागुन २९ मा पूरा हुँदैछ । नयाँ राष्ट्रपतिका लागि पूर्वप्रधानन्यायाधीशदेखि नेताहरुसम्मको नाम चर्चामा छ ।
सत्ता गठबन्धनले गैर राजनीतिक व्यक्तिलाई राष्ट्रपति बनाउन लागेको भन्दै सार्वजनिक वृत्तमा विरोध पनि भइरहेको छ । तर गठबन्धनका नेताहरुले गैरराजनीतिक व्यक्तिलाई राष्ट्रपति बनाउनेबारे सोच्नै नसकिने बताएका छन् । माओवादी केन्द्रका महासचिव देवप्रसाद गुरुङले राजनीतिक पृष्ठभूमिभन्दा बाहिर गएर राष्ट्रपति बनाउने कुरा सोच्न पनि नसकिने बताए ।
मुलुकमा आर्थिक तथा वैदेशिक हस्तक्षेप चुलिएको वेला राजनीतिक पृष्ठभूमिभन्दा बाहिर गएर राष्ट्रपति बनाउने कुरा राष्ट्रिय आत्मसमर्पणवादी चिन्तन हुने उनको भनाइ छ । राजनीतिक दलहरूभन्दा बाहिर गएर राष्ट्रपति बनाउने कुरा आफ्नो दल र गठबन्धनभित्र कहीँ कतै पनि नउठेको उनले स्पष्ट पारे । कांग्रेस नेता विमलेन्द्र निधिले पनि गैर राजनीतिक व्यक्ति राष्ट्रपति बनाउने कुरा हल्लामात्रै भएको बताए । सत्ता गठबन्धनभित्रको पद बाँडफाँड र सहमतिअनुसार राष्ट्रपति चुनिने बताए ।
को बन्छ ?
राष्ट्रपतिमा पूर्वप्रधानन्यायाधीश खिलराज रेग्मीदेखि कल्याण श्रेष्ठसम्मको नाम छ । त्यस्तै राजनीतिक पृष्ठभूमिमा कांग्रेसबाट रामचन्द्र पौडेल र कृष्ण सिटौलाले दाबी गरेका छन् ।
सत्ता गठबन्धनभित्र कांग्रेसको भागमा नपरे प्रचण्डको प्रस्तावमा पूर्वप्रधानमन्त्रीद्वय बाबुराम भट्टराई वा माधव नेपाल बन्न सक्ने सम्भावना छ ।
माओवादीबाट नन्दबहादुर पुन, अग्नि सापकोटा र कृष्णबहादुर महराले पनि आकांक्षा राखेको नेताहरुले बताएका छन् ।
