हिमाचलमा भाजपा-कंग्रेसबीच कडा प्रतिस्पर्धा
काठमाडौँ — भारतीय राज्य गुजरातमा सत्तारुढ दल भारतीय जनता पार्टी(भाजपा) फेरि एकपल्ट सत्तामा आउने भएको छ । यही डिसेम्बर १ र ५ गरी दुई चरणमा भएको गुजरात विधानसभा चुनावको नतिजा बिहीबार आउने क्रम जारी छ ।
मतगणनाको सुरुवाति परिणामअनुसार भाजपा प्रचण्ड बहुमतसहित पुन: सत्तामा आउने देखिएको छ । गुजरातमा २७ वर्षदेखि भाजपाले सरकार चलाउँदै आएको छ । सन् १९९५ देखि गुजरातमा भाजपाले चुनाव हारेको छैन । गुजरातमा सन् २००२ देखि २०१४ सम्म वर्तमान प्रधानमन्त्री नरेन्द्र मोदी मुख्यमन्त्री बनेका थिए ।
पछिल्लो समय दिल्ली र पञ्जाबमा प्रभाव देखाएको आम आदमी पार्टी(आप) ले गुजरातमा पनि भाजपालाई टक्कर दिने अनुमान गरिए पनि नतिजामा भने परिणाम देखिएन । आपले पूर्वपत्रकारसमेत रहेका इसुदान गढवीलाई मुख्यमन्त्रीका चेहराका रूपमा उतार्दै चुनावी प्रतिस्पर्धामा उत्रिएको थियो । भारतीय चुनाव आयोगका अनुसार अहिलेसम्म गुजरातमा १४९ सिटमा सत्तारुढ भाजपाले अग्रता बनाएको छ । त्यस्तै कांग्रेस १८ सिटमा अगाडि रहँदा आप भने ६ सिटमा मात्र अगाडि रहेको छ ।
यही ‘ट्रेन्ड’ अन्तिम नतिजामा रूपान्तरण भए भाजपाले कीर्तिमानी जित हात पार्ने देखिन्छ । गुजरातमा सन् १९८५ को चुनावमा भारतीय कंग्रेसले १४९ सिटमा जित हात पारेको थियो । त्यसयता कुनै पनि दलले १३० सिट कटाउन सकेका थिएनन् । भाजपाले सबैभन्दा बढी सन् २००२ मा १२७ सिट जितेको थियो ।
१८२ सदस्यीय गुजरात विधानसभामा सरकार बनाउन ९२ सिट चाहिन्छ । पछिल्लो पटक सन् २०१७ को चुनावमा भाजपाले ९९ सिट जितेर सरकार बनाएको थियो । कंग्रेस भने ७७ सिट जित्दै सशक्त प्रतिपक्षका रूपमा उभिएको थियो । पछिल्लो चुनावको नतिजा हेर्दा गुजरातमा कंग्रेसले ठूलो क्षति बेहोर्ने देखिन्छ ।
गुजरातमा भाजपाले पश्चिम बंगालमा भारतीय कम्युनिस्ट पार्टी(मार्क्सवादी) को रेकर्डसँग बराबरी गर्ने भएको छ । सीपीआईएमले सन् १९७७ देखि २०११ सम्म लगातार ७ पटकसम्म विधानसभा चुनाव जितेर रेकर्ड कायम गरेको थियो ।
विपक्षमा कंग्रेस र आपबीच भोट बाँडिएकाले त्यसको लाभ सत्तारूढ भाजपालाई पुगेको राजनीतिक विश्लेषकहरूको भनाइ छ । अर्कोतिर प्रधानमन्त्री नरेन्द्र मोदी र गृहमन्त्री अमित शाहको गृह प्रदेशमा भाजपाले आफ्नो सत्ता कायम राख्न पूरा शक्ति लगाएको थियो । प्रधानमन्त्री मोदीकै ‘फेस भ्यालु’ का आधारमा मतदाताले पुनः भाजपालाई रोजेको पनि भारतीय सञ्चारमाध्यमको दाबी छ ।
हिमाचलमा कडा प्रतिस्पर्धा
त्यस्तै अर्को राज्य हिमाचलको पनि चुनावी नतिजा आइरहेको छ । हिमाचलमा सत्तारुढ भाजपा र कंग्रेसबीच कडा प्रतिस्पर्धा देखिन्छ । अहिलेसम्मको गणनामा भाजपा र कंग्रेस समान ३२/३२ सिटमा अगाडि देखिन्छन् । त्यस्तै हिमाचलका ४ सिटमा स्वतन्त्र उम्मेदवार अगाडि देखिन्छन् । हिमाचलमा ६८ सिटको विधानसभामा सरकार बनाउन ३५ सिट चाहिन्छ । यही ट्रेन्ड कायम रहे हिमाचलमा ‘सत्ताको चाबी’ स्वतन्त्र उम्मेदवारको हातमा पुग्ने देखिन्छ ।
सन् २०१७ को चुनावमा हिमाचलमा भाजपाले ४४ सिटमा जित हात पारेको थियो । कंग्रेसले २१ स्थानमा जित हात पार्दा अन्य उम्मेदवार ३ सिटमा विजयी भएका थिए । ईकान्तिपुर
