वर्तमान संविधान नश्लीय र खुनी रहेको मन्त्री सोनलको आरोप

धनुषा : बहुमतको दम्भमा जारी वर्तमान संविधान खुनी संविधान रहेको प्रदेश नम्बर २ का भौतिक पुर्वाधार विकास मन्त्री जीतेन्द्र सोनलले आरोप लगाएका छन ।

जनकपुरधाममा शनिवार आयोजित एक कार्यक्रमलाई सम्बोधन गर्दै मन्त्री सोनलले बहुमतको दम्भमा सरकारले जारी गरेको संविधान खुनी संविधान रहेकोले आफुहरुलाई मान्य नहुने बताए ।

जनकपुरधाम उपमहानगरपालिका वडा नम्बर ७ ले आयोजना गरेको आपतकालिन निःशुल्क स्वास्थ्य शिविर अभियान सम्मान तथा धन्यवाद ज्ञापन कार्यक्रमका प्रमुख अतिथि रहेका मन्त्री सोनलले वर्तमान संविधानले हरेक वर्ग र समुदायको अधिकार समेट्न नसकेकाले यसलाई स्वीकार गर्न नसकिने बताउँदै यो संविधान खुनी र नश्लीय चिन्तनले जारी गरिएको संविधान रहेको भने ।

उनले मधेसी, जनजाती, आदिवासी, मुस्लिम, महिला लगायतका कुनै वर्ग र समुदायको अधिकार संविधानमा ग्यारेण्टी नगरिएको बताउँदै उनले संविधान संशोधन नभएसम्म असोज ३ लाई कालो दिनको रुपमा मनाउने चर्चा समेत गरे ।

कार्यक्रममा संघीय सांसद उमाशंकर अरगरियाले असोज ३ मा मधेसी जनतासँग सरकारले ठूलो धोका गरेकाले यस दिनलाई कालो दिनको रुपमा मनाउन आग्रह गरे ।

त्यस्तै कार्यक्रममा जनता समाजवादी पार्टीका सचेतक समेत रहेका प्रदेशसभा सदस्य परमेश्वर साहले मधेशी जनताको बलिदानीले देश संघिय प्रणालीमा गएपनि सरकारले मधेशी जनताको बलिदानीलाई कदर गर्न नसकेको आरोप लगाए ।

सो कार्यक्रममा जनता समाजवादी पार्टीकी नेतृ एवं पूर्व राज्यमन्त्री सुरिता साह, जनकपुरधाम उपमहानगरपालिकाका उपमेयर रिता कुमारी मिश्र, जिल्ला समन्वय समितिका उपसभापति दिपक झालगायत विभिन्न वडाध्यक्ष तथा स्थानीय नेताहरुको उपस्थिती रहेको थियो । lokpukar