सप्तरीमा करेन्ट लागेर ससूरा–बुहारीको मृत्यु

राजविराज । सप्तरीमा करेन्ट लागेर दुई जनाको मृत्यु भएको छ । मृत्यु हुने ससूरा र बुहारी हुन् ।
जिल्लाको कंचनरुप नगरपालिका वडा नम्बर ६ बस्ने ४० बर्षीय सौदानन्द सरदार र सोही ठाउँकी २१ बर्षीया अन्जली सरदार रहेको प्रहरीले जनाएको छ । सौदानन्द काका ससूरा हुन् भने अन्जली बुहारी रहेको इलाका प्रहरी कार्यालय कंचनपुरका प्रमुख डीएसपी रामकुमार यादवले जानकारी दिए ।
पानी तान्ने मोटर जडान भएको ट्युववेलमा पानी लिन गएकी अन्जलीलाई करेन्ट लागेको थियो । त्यसै बेला उनलाई छुटाउन जाँदा सौदानन्दलाई पनि करेन्ट लागेको डीएसपी यादवले बताए ।
उनका अनुसार करेन्ट लागेका दुबैको घट्नास्थलमै मृत्यु भएको छ । यस सम्बन्धमा अन्य अनुसन्धान भइरहेको प्रहरीले जनाएको छ ।