काठमाडौं । सप्तरीका एक स्थानीय तहका जनप्रतिनिधि भारतीय नागरिक रहेको खुलासा भएको छ । भारतीय नागरिक नेपालमा जनप्रतिनिधि रहेको भन्दै स्थानियहरुले उजुरीको तयारी गरेपछि यसको खुलासा भएको हो ।
जिल्लाको डाक्नेश्वरी नगरपालिकाका उपमेयर भारत र नेपाल दुबै देशको नागरिक रहेको भन्दै जिल्ला प्रशासन कार्यालय र सप्तरी जिल्ला अदालतमा उजुरी दिन लाग्दा सो कुरा बाहिर आएको हो ।
भारतीय भोेटरलिष्टमा उपमेयर यादव र उनका श्रीमान महेन्द्र कुमार यादवको नाम देखिएपछि स्थानियहरुले उजुरी दिन लागेका हुन । कसैले अर्को देशको नागरिकता लियो भने उसको नेपालको नागरिकता कायम नरहने व्यवस्था नेपालको नागरिकता ऐन, २०६३ मा उल्लेख छ । तरर्, जनप्रतिनिधिकै दोहोरो नागरिकता भएको प्रमाण भेटिएपछि स्थानीयवासी समेत आश्चर्यमा परेका छन् ।
स्थानीय तहको चुनावमा नेकपा एमालेबाट उपमेयरमा जितेका यादव भारतको मधुवनी जिल्लाको मझारीका बासिन्दा रहेको प्रमाण फेला परेको छ । भारतको निर्वाचन आयोगको लिस्टमा समेत यादवको फोटो सहितको मतदाता नामावली देखिएको छ भने उनको श्रीमान महेन्द्र कुमार यादवको समेत फोटो सहित भारतको भोटर लिस्टमा नाम उल्लेख छ । उनीहरूले सन् २०२२ मा विहारको स्थानिय निर्वाचनमा मतदान समेत गरेका छन् ।
उपमेयर यादव फर्जि कागजात पेश गरेर भारतीय नागरिकताको साथै नेपाली नागरिकता समेत लिएको स्थानियहरुको आरोप छ ।
