राजविराज । नेपाल सरकारले बालबालिकालाई श्रम गराउन निषेध गरेको छ । बालबालिकालाई श्रममा लगाउने उपर दण्ड सजायको व्यवस्था पनि गरेको अवस्थामा स्थानिय सरकारले पनि बालश्रम निषेधको नीति अनुसार विभिन्न जनचेतनामूलक कार्यक्रम गर्दै आएको अवस्थामा सप्तरीको एक गाउँपालिकामा आरसिसि सडक ढलान गर्न विद्यालयमा अध्ययनरत बालबालिकाको प्रयोग गरिएको पाईएको छ ।
जिल्लाको राजगढ गाउँपालिका वडा नम्बर ३ स्थित रहेको श्री जनता अधारभुत विद्यालयको वाटो निर्माणको काममा बालबालिकाहरुलाई प्रयोग गरिएको हो । सामाजिक सञ्जाल फेसबुकमा सार्वजनिक भएको भिडियोमा स्कूले बालबालिकाहरुले सडमा ईंटा बिछाउँदै गरेको हेर्न सकिन्छ ।
गाउँपालिकाले विद्यालय जाने वाटो सडक ढलान गर्ने योजना अन्तर्गत उपभोक्ता समिति र प्रधानाध्यापकको मिलोमतोमा विद्यालयमा अध्यनरत बालबालिकाहरुलाई प्रयोग गरी आरसिसि सडक ढलान गरिएको स्थानियहरुले बताएका छन ।
एक सय मिटर सडक ढलानका लागि श्रमिकको रुपमा प्रयोग गरिएको बालबालिकाको अभिभावकले आपत्ती समेत प्रकट गरेका हुन् ।
विद्यालयका प्रधानाध्यापक रामचन्द्र यादव र विद्यालय व्यवस्थापन समतिका अध्यक्ष अमिरलाल यादवले सडक ढलानका लागि विद्यालयको वाटोमै ईट्टा राखेको हुदा सडक खुलाउन विद्यार्थीहरुलाई प्रयोग गरेको स्वीकारेका छन ।
प्रधानाध्यापक यादवले भने ‘गलत मंसायले बालबालिकाहरुलाई प्रयोग गरेको होईन वाटो अवरुद्ध खुलाउन केही वेर विद्यार्थाीहरु बाटोबाट ईटा हटाईएको हो , यसलाई समाजिक संजालमा गलत प्रचार गरियो ।’
यता गाउँपालिका अध्यक्ष ओम प्रकाश मंडलले बालबालिका प्रयोग गर्ने उपभोक्ता र प्रधानाध्यापकलाई छानविन गरि कार्वाही गर्ने बताए ।