सिरहा । जनमत पार्टीका कार्यकर्ताले बन्दको अवज्ञा गरेको भन्दै सिरहामा ट्रक जलाएाके छ ।
पूर्वपश्चिम राजमार्ग अन्तर्गत सिरहाको मिर्चैया बतहाखोला नजिकै हिमालय सुगरमिल्समा उखु पु¥याएर पश्चिमतर्फ जाँदै गरेको ना ५ ख १००९ नम्बरको ट्रकमा आगजनी गरेका हुन् ।
ट्रकका धनीसमेत रहेका चालक विजय साहले जनमतका कार्यकर्ताहरुले एक्कासी ट्रकमा ढुंगामुढा गरेपछि आत्तिएर गाडी रोक्ने बित्तिकै ट्रकमा पेट्रोल छर्केर आगजनी गरेको बताए ।
घाइते चालक र सहचालकको मिर्चैयामा उपचार भइरहेको प्रहरीले जनाएको छ । ट्रकमा लगाइएको आगोलाई प्रहरीको सहयोगले नियन्त्रणमा लिइएपनि ट्रक पूर्णरुपले जलेको छ ।
धनुषाको मिथिला नगरपालिका वडा नं. ९ का साहले पाँच कठ्ठा जमिन बैंकमा धितो राखेर दुई वर्ष अगाडि ट्रक किनेको बताए । उनले ट्रकको आम्दानीले ऋण तिर्ने योजना बनाएपनि अहिले ट्रकमा नै आगजनी भएपछि उनी चिन्तित बनेका छन् ।
यसअघि पनि जनमतका कार्यकर्ताले सिरहाको चोहर्वा र सप्तरीमा राजमार्गमै ट्रक जलाएका थिए । पार्टीले किसान आन्दोलनको नाममा पुस १५ गतेबाट अनिश्चितकालीन तराई मधेसको दिवाकालीन सडकजाम आह्वान गरेको छ ।
आइतवार मात्र धनुषामा जनमतका कार्यकर्ता र प्रहरीबीच झडप हुँदा एक दर्जनभन्दा बढी घाइते भएका थिए । घाइतेहरुमध्ये अधिकांश प्रहरी नै रहेका थिए ।
