काठमाडौं । प्रदेश २ को वीरगञ्ज–पथलैया व्यापारिक मार्ग अन्र्तगत परवानीपुर बजार विद्यार्थीहरुले गरेको चक्का जाममा प्रहरीले १३ राउण्ड अश्रुग्यास हानेको छ ।
अंग्रेजी र विज्ञान विषयको शिक्षकको माग गर्दै सोमबार विद्यार्थीहरुले बिहान साढे ११ बजेदेखि साढे १२ बजेसम्म चक्काजाम गर्नुको साथै टायर बालेर प्रदर्शन गरेका हुन् ।
वीरगञ्ज महानगरपालिका वडा नं. २१ स्थित रहेको नेपाल गीता गजेन्द्रराज जोशी माविका विद्यार्थीको भिडलाई नियन्त्रणमा लिन प्रहरीले १३ राउण्ड अश्रुग्यास हानेको छ ।
तीन दिनअघि विद्यार्थीले लिपनीविर्ता स्थित वडा कार्यालयम समेत प्रदर्शन गरेका थिए । प्रदर्शन रोक्न गएको प्रहरीलाई विद्यार्थीले ढुंगा प्रहार गरेका थिए ।
विद्यार्थीको भिड नियन्त्रणमा लिने क्रममा प्रदर्शनमा सहभागी केही विद्यार्थी घाइते समेत भएका छन् । विद्यार्थीहरुको प्रदर्शनको क्रममा कक्षा १० मा अध्ययनरत्त रहेका लक्षमिना पटेल, सोनु पटेल, अखिलेश मण्डल, प्रेमराज मण्डल, सुवोध पटेल, राहुल देवान लगायत घाईते भएको प्रदर्शनमा सहभागी विद्यार्थीले बताएका छन् ।
उनीहरुको नजिकैको स्वास्थ्य चौकीमा उपचार गरिएको छ । त्यस्तै विद्यार्थीले गरेको ढुंगा प्रहारबाट प्रहरी तर्फ ४ जना घाईते हुनुको साथै दुईवटा गाडीको सीसा फुटेको प्रहरीले जनाएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक ओमप्रकाश खनालले स्थिति नियन्त्रण भन्दा बाहिर गएपछि १३ राउण्ड अश्रु ग्यास प्रहार गर्नुपरेको बताए । उनले विद्यार्थीहरुको प्रदर्शन रहेकोले लाठी हान्ने नभएपछि भिडलाई तितर वितर गर्न अश्रुग्यास हानेको बताए ।
बाल विकासदेखि कक्षा १० सम्म अध्यापन हुने विद्यालयमा ८ सय विद्यार्थी अध्ययनरत रहेपनि विद्यालयमा ४ शिक्षिका र ११ शिक्षक छन् ।
